Өндөг хүмүүсийн өдөр тутмын хүнсний хэрэглээнд том байр суурь эзэлдэг билээ. Чанарын шаардлага хангасан дундаж хэмжээтэй нэг өндөг тэжээллэг чанараараа 40 грамм үхрийн мах, 200 грамм сүүтэй тэнцдэг. Өдөрт нэг өндөг хэрэглэснээр насанд хүрсэн эрэгтэй хүн өөрт шаардагдах уураг эрдэс бодисын хэрэгцээний гурван хувь, эмэгтэй хүн дөрвөн хувийг, витамины хэрэгцээний 10-30 хувийг авах боломжтой аж.
БНХАУ-ын судлаачид өндөг хүний биед ямар ач тустайг тогтоохоор урт хугацааны судалгаа хийсэн байна. Тэд өдөр бүр өндөг иддэг хүмүүсийг хааяа нэг иддэг хүмүүстэй харьцуулжээ. Өдөр болгон өндөг иддэг хүний цус харвах эрсдэл 26 хувиар, цус харвалтын улмаас нас барах эрсдэл 28 хувиар, зүрх судасны өвчнөөр хорвоог орхих эрсдэл 18 хувиар бага байгаа нь тус тус тогтоогджээ. Судалгаанд оролцогчдын 13 хувь нь өдөр бүр, харин есөн хувь нь өндөг огт иддэггүй гэсэн хариулт өгчээ.
Судалгааны ажил эхэлснээс хойш 8,9 жилийн дараа өндөгний хэрэглээ багатай 83.977 хүн зүрх судасны өвчтэй болж, үүнээс 9985 нь нас барсан байна. Энэ нь өдөр бүр өндөг иддэг хүн зүрх судасны өвчин тусах эрсдэл бага байгааг харуулжээ.
"Heart" эрүүл мэндийн сэтгүүлд нийтлэгдсэн уг судалгаа 8,9 жилийн турш үргэлжилсэн байна. Судлаачид БНХАУ-ын 10 байршлаас 30-79 насны 500 мянга гаруй хүнээс өндөг хэр их иддэг талаар асууж, тэдний мэдээллийг судалжээ. Судалгаанд хамрагдагсдын 416 мянга нь ямар нэг архаг өвчингүй эрүүл хүмүүс байсан гэнэ.
"Бидний судалгаа эрүүл хүмүүст өндөгний хэрэглээний талаар шинжлэх ухааны үндэслэлтэй мэдээллийг өгсөн маш чухал ажил болсон" гэж судалгааг удирдсан профессор Лиминг Ли хэлсэн байна.