Хичээлийн шинэ жил эхлэх гэж байгаатай холбогдуулан БСШУСЯ-наас хэвлэлийн хурал хийлээ.  БСШУС-ын сайд Ц.Цогзолмаа:

-Эцэг эхчүүдийн үүрэг хаягдсан. Өдөр тутмын хичээлийн явцад хүүхдийнхээ төлөө анхаардаг байя. Эцэг эхчүүдийн бодит оролцоог сайжруулж байж сурлагын чанар сайжирна.

Бүх төрийн албан хаагч нарын цалинг нэмэгдүүлсэн. Багш нарын түр хорооныхон өнөөдөр лоозон бариад сууж байна. Түр хорооныхны эхний шаардлага хэрэгжиж эхэлсэн. Засгийн газар гурван жилд үе шаттай багш нарын цалинг нэмэгдүүлнэ гэсэн шийдвэр гаргасан хэмээлээ. Тэрбээр мэдээлэл хийснийхээ дараа сэтгүүлчдийн сонирхсон асуултад хариулав. 

-Засгийн газраас хөрөнгө нь шийдэгдсэн сургуулийн барилгын ажил  юу болсон бол?

-Энэ есдүгээр сарын нэгэнд орон нутагт гурван сургууль, нийслэлд есөн цэцэрлэг нээгдэнэ.  Сургуулийн өргөтгөлийн барилга он дамжаад ирэх ажил хүлээлгэж өгнө. Ирэх оны есдүгээр сарын нэгэнд 27 сургууль өргөтгөөд, 142 цэцэрлэг үүд хаалгаа нээх төлөвлөгөөтэй байгаа юм.

-Нарны хорооллын цогцолборын асуудал хэрхэн шийдэгдсэн бол?

Нарны хорооллын сургуулийн асуудлаар Засгийн газар шийдвэрээ гаргасан. Компанийнхан хөрөнгийн асуудал шийдэгдсэний дараагаар хичээлийг эхлүүлнэ. Компанийн гаргасан хүсэлтийн дагуу манайх гурван ажлын хэсэг байгуулан үнэлгээний асуудал дээр Засгийн газрын хуралдаанаар оруулна. Эхний өгсөн үнэлгээний санал 21.9 тэрбум төгрөг. Сургууль нть 960, цэцэрлэг нь 220 хүүхдийнх. Компани өөрийн бодит хөрөнгөө гаргаж барьсан. Тиймээс үнэлгээ өндөр байгаа гэсэн. Ажлын хэсэг байгуулагдаад үнэлгээг 17.8 тэрбум төгрөг хүртэл бууруулсан. Засгийн газар дахин хөрөнгийн үнэлгээг буулга гэдэг үүрэг өгсөн.

-Сургалтын төлбөр өндөр  байгаа гэж оюутнууд жагссан. Яам асуудалд хэрхэн хандаж байна вэ?

-Их дээд сургуулийн төлбөрийн талаар МУИС-ийн оюутнууд жагссан. Оюутнуудын жагсаал дээр ёс зүйн алдаа гаргасан н.Ганбат багшид хариуцлага тооцож байгаа гэдгээ мэдэгдсэн.

Сургалтын төлбөрийг нэмэх асуудал хуулиараа сайдын эрхлэх хүрээнд байдаг ч ТУЗ нь шийддэг. Сургалтын төлбөр нэмэх шийдвэр гаргавал яаж нэмэх талаар тооцоо судалгаа хийж, эцэг эхийн зөвлөлтэй уулзаарай гэдэг. Өнөөдөр Дээд боловсролын газрын даргатай уулзана.

Н.Энх