Г.Ариунбаатар Буриадын дуурийн театрын нээлтэнд оролцохоор бэлтгэж байна
Чайковскийн нэрэмжит олон улсын XV уралдааны гран-при шагналт дуучин Г.Ариунбаатар амралтаа дуусгаад ОХУ-ын Буриадын Дуурийн театрт үргэлжлүүлэн ажиллахаар ОХУ-ын Ардын жүжигчин Дарима Линховоины удирдлага дор театрын өвлийн улирлын нээлтийн тоглолтод бэлтгэж байгаа талаар Буриадын театрын хэвлэлийн алба мэдээлснийг "Восток-Телеинформ" дамжууллаа.
“Дэлхийн дуучин-2017” наадмын шагналт дуучин залуу Буриадын дуурийн театрын есдүгээр сарын 12-нд болох 79 дэх жилийн өвөл цагийн тоглолтын нээлтэнд “Багт наадмын бүжиг” жүжгийн Анкарстремийн ариг дуулахаас гадна хоёр хоногийн дараа болох гала-концертод бас оролцох юм байна.
“Шинэ улирлын тоглолтын нээлтээр Буриадын Дуурийн театрын тайзан дээр гарах гэж байгаадаа би тун их баяртай байна. Би өөртөө 100 хувь итгэж байна, үүнд бүү эргэлз” гэж Г.Ариунбаатар ярьжээ.
Тэрээр үүний өмнө Москва, Санкт-Петербургт болсон концертуудад гоцлон дуулж байсан юм. 2018 онд Буриад улсын Дуурь бүжгийн академик театрын гоцлон дуулаач тэрбээр энэ жил гадаадад тоглох төлөвлөгөөтэй байгаа аж. Гэхдээ зөвхөн нэг удаагийн гэрээ юү, Улан-Үдийг бүр орхих уу гэдгээ дуучин маань тодорхой шийдээгүй гэнэ.
Британийн "The Guardian" сонин Монголын дуурийн дуучныг Буриадын дуурийн театрын жинхэнэ баатар болжээ хэмээн бичиж байсан. "ВВС"-гийн сэтгүүлчид өнгөрсөн зун Ариунбаатарын тухай нэвтрүүлэг хийхээр хэрэг болгон Монголд ирж зураг авч байв. Тэрээр Карнеги-Холлд, Хатан хааны гэр бүлийнхэнд зориулан Букингемийн ордонд гээд бүхий л нэр хүндтэй газруудын тайзан дээр дуулсан хүн.
Г.Ариунбаатар 2015 онд Чайковскийн нэрэмжит уралдааны гран-при шагнал хүртсэн бол 2017 онд Кардиффед болсон “Дэлхийн дуучин” уралдааны "Song Prize" номинацид ялсан юм. Мөн Мусли Магмаевийн нэрэмжит олон улсын III уралдааны тэргүүн шагнал, Глинкийн нэрэмжит гоцлол дуучдын олон улсын XXIV уралдаан болон Байгалын Гоцлол дуучдын олон улсын уралдааны тэргүүн байрын шагнал хүртэж байсан юм.