Сүүлийн жилүүдэд ажилтан албан хаагчдын давуу тал болон дутагдлын талаар их ярьж хэлэлцэх боллоо. Удирдагчдын нэг хэсэг нь удахгүй хүүхэд гаргаад явчихна гээд эмэгтэйчүүдийг ажилд авахад дургүй байдаг бол нөгөө хэсэгнь удалгүй тэтгэвэртээ гарна хэмээн хижээл насныхныг ажилд авах дургүй байх жишээтэй. Харин эрдэмтэд хүний ажлын хамгийн идэвхтэй, эрч хүчтэй үе нь 50-иас дээш насанд байдаг гэж хариулжээ.
Хамгийн тохиромжтой нас:
Судалгаагаар 50 настай хүмүүс илүү их идэвхтэй, амжилттай болохыг баталжээ. Энэ насанд төрөл бүрийн салбарт ажиллагсад мэргэжлийн ур чадвараа илүү өндөр гаргадаг гэнэ. Израилийн эрдэмтэд ийм насанд дэвшиж ажиллах илүү их боломжтой гээд 50 насанд удирдах албанд шилжих нь хамгийн зохистой гэсэн байна. Энэ насанд хүн хариуцсан үүргийнхээ төлөө маш их бүтээлч ажилладаг байна.
Судалгааны дүн:
Израильд явуулсан судалгаагаар 50-иас дээш насныхан мэргэжлийн даалгавар биелүүлэхдээ илүү эрч хүчтэй ханддаг гэжээ. Энэ үед өөрийн эрхэлж байгаа ажилдаа чин сэтгэлээсээ хандаж түүнээсээ таашаал аван ур чадвараа бүрэн гаргаж ажилладаг байна. Ингээд удирдах ажилтны ур чадвар, хариуцлага, ажлын үр дүнд нас чухал үүрэгтэй болох нь эрдэмтдэд тодорхой боллоо. Судалгаанд өндөр технологийн, инженерийн болон дэд бүтэц, төрийн болон хувийн хэвшлийн удирдах ажилтан 545 хүн оролцсон бөгөөд эрдэмтэд томоохон төслийн удирдагчдаас авахуулаад ахлах менежерүүдийг сонгон авчээ.
Амжилтын нууц:
Судалгааны явцад хамгийн амжилттай менежерүүд өндөр үр ашигтай ажиллахын тулд хувийн нөөц боломжоо ашиглаж байгаа нь харагдсан байна. Энд тэдний амлалт, итгэл үнэмшил, хүнд итгэх итгэл, үүрэг хариуцлагаа ухамсарлах явдал нь фирмийг удирдахад чухал үүрэг гүйцэтгэдэг нь харагджээ.
Ажил олгогчдоо итгэл олж тэдний дэмжлэгийг сайн авдаг ажилтнуудын ажлын бүтээмж өндөр байдаг байна.
Эрхэлсэн ажилдаа эзэн болж, шинэ санаа санаачилга гаргаж чаддаг удирдагчид ч өндөр идэвхтэй ажиллаж чадна. Тэгэхээр шаардлагатай нөөц боломжуудыг ашиглаж чаддаг менежерүүдийг л байгууллагууд авч ажиллуулах хэрэгтэй гэсэн үг. Үүнийг л эрдэмтэд 50-иас дээш насныхан гэж хэлээд байгаа юм. Өөрийн байгууллага, аж ахуйн нэгжээ амжилттай хөгжүүлье гэвэл хариуцлагатай, идэвхтэй, ажлын бүтээлтэй тийм удирдагчийг ажиллуулах хэрэгтэй болж байна даа.
