Цэргийнхнийг интернэтэд өөрийнхөө тухай бичихийг хориглосон хууль гаргана
Цэргийн албан хаагчдыг хэвлэл мэдээллийн хэрэгсэл болон интернэтэд өөрийнхөө болон хамт алба хааж байгаа нөхдийнхөө тухай мэдээлэл оруулахыг хориглох тухай хуулийн төслийг ОХУ-ын Засгийн газар Төрийн Думд өргөн барилаа гэж "ТАСС" агентлаг мэдээллээ.
Төрийн Думын албан ёсны мэдээнд дурдсанаар бол энэ хуулиар цэргийн албан хаагчдыг интернэт, олон нийтийн мэдээллийн хэрэгслүүдэд өөрийн болон хамт алба хааж байгаа нөхдийнхөө тухай, албан үүрэг, байрлалынхаа талаар дүрс бичлэг, гэрэл зураг, бусад мэдээлэл нийтлэхийг хориглох юм байна. Мөн цэргийн анги, салаа салбарынхаа тухай баримт мэдээлэл, байгаа газар зэргийг ч нийтэлж болохгүй гэжээ.
Хуулийн төсөл боловсруулагчид “Цэргийн алба хаагчид сошиал орчинд өөрийн тухай бичсэнээрээ бусад улс орнуудын тусгай албад, алан хядагчид, хэт даврагч бүлэглэлүүдийн сонирхлыг татаж байна” гэж тэмдэглэжээ. Хэвлэл мэдээллийн хэрэгсэл, интернэтэд оруулсан зураг, мэдээллийг тэд ОХУ-ын төрийн бодлогод үнэлэлт дүгнэлт өгөх хэрэгсэл болгон ашиглаж болзошгүй гэсэн байна.
Үүнтэй холбогдуулан мэдээлэл чөлөөтэй солилцох, үндэсний аюулгүй байдал, ялангуяа мэдээллийн аюулгүй байдлыг хангах хүрээнд цэргийн албан хаагчдыг өөрийнхөө гүйцэтгэж байгаа үүрэг, үйл ажиллагаа, цэргийн анги байгууллага, байрлал зэргийг олон нийтийн мэдээллийн хэрэгсэлд нийтлэхийг хориглох хэрэгтэй байна гэжээ.
Хуулийн төсөл боловсруулагчид бас “Энэ хэм хэмжээ нь тодорхой хүрээнд үйлчлэхээс бус хүний эрхийг хүчээр хаан боогдуулж байгаа хэрэг биш” гэсэн байна. Энэхүү хууль нь цэргийн албан хаагчдын албаны үйл ажиллагаа, цэргийн ангийн талаарх мэдээлэлд л хамаатай. Энэ хоригийг зөрчсөн албан хаагчид удирдлагын зүгээс сахилгын хариуцлага тооцож байх юм байна. Магадгүй энэ нь хөдөлмөрийн гэрээг хугацаанаас нь өмнө цуцалж албан ажлаас нь халах үндэслэл ч болж болно.
Хуулийн төсөл боловсруулахдаа гадаад орнуудын туршлагыг харгалзаж үзсэн гэнэ. Мөн “Цэргийн албанаас халагдсан албан хаагчдад энэ хууль үйлчлэхгүй” ажээ.