Монгол Улс ШАХБ-д элсэх тухай ярьж байна
Монгол Улсын Гадаад хэргийн сайд Д.Цогтбаатар “Монгол Улс Шанхайн хамтын ажиллагааны байгууллагад элсэх боломжийг судалж байна” гэж мэдэгдсэнийг оросын хэвлэлүүд дамжуулжээ байна.
Энэ санааг хамгийн эхлээд Монгол Улсын ерөнхийлөгч Х.Баттулга өнгөрсөн тавдугаар сард хэлж байжээ. Тэрбээр Монгол Улс 2004 онд байнгын ажиглагчаар элссэн Шанхайн хамтын ажиллагааны байгууллагад өөрийн байр сууриа улам бэхжүүлж, статусаа өөрчлөхийг эрмэлзэж байна гэсэн юм. Х.Баттулга бас энэ байгууллагад элссэнээр эдийн засаг болон дэд бүтцийн томоохон төслүүдийг хэрэгжүүлэх таатай орчин бүрдэнэ гэсэн байна.
Монголын Гадаад хэргийн сайд Д.Цогтбаатар Владивостокт болсон Дорнын эдийн засгийн форумын үеэр оросын “Коммерсант” хэвлэлд ярилцлага өгөхдөө Монгол Улс өнгөрсөн оны зургадугаар сард Шанхайн хамтын ажиллагааны байгууллагын бүрэн эрхт гишүүн болсон Энэтхэг Пакистан улсуудын жишээгээр энэ байгууллагад нэгдэх боломжийг судалж эхэлсэн гэжээ.
Гадаад хэргийн сайдын хэлснээр бол ийм алхам хийх асуудлаар парламент авч хэлэлцэх юм байна. Олон улсын энэ байгууллагын дүрэмд зааснаар бол хамгийн гол нь салан тусгаарлах үзэл, хар тамхи, хүчирхийлэл, терроризмтай тэмцэх явдал юм. Д.Цогтбаатарын хэлснээр бол Монгол Улсад ийм бэрхшээл байхгүй юм байна.
Монгол Улсын хувьд эдийн засгийн хамтын ажиллагаа, шинжлэх ухаан, соёлын салбарт эрчимтэй түншлэл хүсч байгаа нь Шанхайн хамтын ажиллагааны байгууллагын эрхэм зорилго юм. Ганцхан Монголын эрх баригчид энэ талаар эцсийн шийдвэр гаргах гэж яарахгүй, эерэг, сөрөг бүхий л талыг нь анхааралтай судалж байгаа ажээ.