Элон Маск(Өмнөд Африк гаралтай АНУ-н бизнесийн магнат, зохион бүтээгч)-ын санаачилсан өндөр хурдны газрын тээвэр буюу "hyperloop" тээвэр бодит амьдрал дээр биеллээ олох мөч ойртсоор. Тус тээврийн хэрэгслийн төрөлд хэд хэдэн компани өрсөлдөж буйн нэг болох "HTT" компани зорчигчдыг соронзон хоолой ашиглан маш өндөр хурдтайгаар тээвэрлэхэд зориулагдсан капсулыг 3 жилийн дотор ашиглалтад оруулна гэдгээ мэдэгдсэн байна.

Тус капсул нь 105 фут урт, 5 тонн жинтэй байна хэмээн тооцоолжээ. Харин дотоод заслыг нь бүрэн дуусгаагүй байгаа бөгөөд ойролцоогоор 28-40 хүн тээвэрлэх багтаамжтай байх аж. "HTT" компани тус капсулыг карбон утас болон мэдрэгч зэргээс бүрддэг вибраниум гэх материалаар хийх гэнэ. Энэ материал нь ган(төмөр ба нүүрстөрөгчийн механик хайлш)-аас 8 дахин, хөнгөн цагаанаас 10 дахин илүү бат бөх юм байна.

Капсулыг одоо Франц улс дахь HTT-ийн судалгаа, хөгжлийн төвд шилжүүлэн угсралтын ажлыг дуусгаснаар байгууламжийг бүрэн хэмжээгээр хянах туршилтыг явуулах юм байна. HTT компанийн Гүйцэтгэх Захирал Дирк Айлборн “Хууль эрх зүйн орчин бүрдүүлснээр энэхүү өндөр хурдны тээвэрлэлтийг дэлхий даяар 5-10 жилийн дотор нэвтрүүлэх боломжтой” хэмээн онцолсон байна.

Дээр дурдсан өндөр хурдны "hyperloop" тээвэрлэлтийг анх 2013 онд Тесла компанийн Гүйцэтгэх Захирал Элон Маск санаачилж байжээ. Энэ технологи нь цахилгаан соронзонгийн тусламжтайгаар асар том хоолойгоор 700 гаруй миль хүртэл хурдлах боломжтой юм.

Жишээ нь: Лос-Анжелесаас Сан Францискоруу маш богинохон хугацаанд буюу 30 минутын дотор очих чадалтай гэсэн үг.

"HTT" компани одоогоор Хятад, Украйн, Арабын Нэгдсэн Эмират зэрэг улсад өндөр хурдны газрын тээврийн зам барих гэрээнд гарын үсэг зураад байгаа юм байна.

Элон Маскын санаачилсан "hyperloop" тээвэрлэлтийг бодит байдалд хэрэгжүүлэхээр ажиллаж буй өөр нэгэн компани бол "Virgin Group" юм. Тус компани өнгөрсөн хоёрдугаар сард “Virgin Hyperloop One” хэмээх "hyperloop" тээвэрлэлтийн туршилтын загварыг танилцуулсан байна.

"HTT" компани өөрийн өрсөлдөгч "Virgin Hyperloop One"-с ялгаатай нь одоогоор "hyperloop" капсулыг амжилттай туршаагүй байгаа юм.

Мөн "HTT" компани юун түрүүнд "hyperloop" аялал жуулчлалын эрх зүйн зохицуулалт болон хууль зүйн орчинг баталгаажуулахад анхаарч байгаа юм байна.

Үүний дээр тус компани нь зарим орнуудад тус систем эдийн засгийн хувьд хэрэгжих боломжтой эсэхийг судлахын тулд "Техник эдийн засгийн судалгаа" хийж байгаа аж.