Бизнесмэнүүд, технологийн салбарын томчуудаас эхлээд урлаг, спортын алдартнуудаас бүрдсэн Америкийн 16 тэргүүн баяны орлогын мэдүүлэг дээр судалгаа хийж, цагт олдог орлогыг нь тооцоолоход айхавтар том тоо гарсан нь ойлгомжтой. "Business Insider" сайт нь энэхүү судалгааг хийхдээ "Форбс" сэтгүүлийн жагсаалтан дээр үндэслэж тэрбумтан бүрийн жилд олох боломжтой нийт орлогыг тооцсон байна. Харин хөгжим, кино урлаг, хэвлэл мэдээллийн салбарын тэрбумтнуудын орлогыг "Форбс" сэтгүүлийн гаргасан "2018 оны хамгийн өндөр орлоготой алдартнууд" жагсаалтнаас авчээ. Ингээд жилийн орлогыг нэг жилд байх нийт цаг буюу 8760-д хувааснаар дараах үр дүн гарчээ.

Эдгээрээс цагт саяас илүүг олдог нь Жефф Безос, Марк Цукерберг, Алис Уолтон нар байна. Харин "Амазон"-ыг үндэслэгч Жефф Безос цагт 4,474,885 ам. доллар буюу "Амазон"-ы ажилчны жилд авдаг дундаж цалингаас (28,466 ам. доллар) 157 дахин их орлого олж байна. Үлдсэн зургаан тэрбумтны хувьд зургаан оронтой тоо бүхий орлоготой буюу Уоррен Баффет 958,904 ам.долларыг, "Hewlett-Packard"-ийн ерөнхий захирал асан Мег Витман 102,739 ам.долларыг тус тус олдог аж. Харин "Google"-ийн Ларри Пэйжийн орлого 924,657 ам.доллар байна. 

Алдартнуудын хувьд Жорж Клүни хамгийн ихийг буюу цагт 27,283 ам.долларыг олж байна. Тэрээр мөн "Форбс" сэтгүүлийн "2018 оны хамгийн өндөр орлоготой алдартнууд" жагсаалтад хамгийн өндөр орлоготой жүжигчин болон тэргүүлжээ. 

Түүний араас цагт 19,006 ам.долларын орлоготой "Форбс" сэтгүүлийн "Америкийн өөрөө хөрөнгөжсөн хамгийн баян эмэгтэйчүүд" жагсаалтад бичигдсэн хамгийн залуу эмэгтэй болох Кайли Женнер/Kylie Jenner/ оржээ. Энэ нь тэрээр ердөө хоёр цаг хагасын дотор АНУ-ын ажилчдын жилийн дундаж орлого буюу 45,552 ам.долларыг олдог гэсэн үг юм. Шоу нэвтрүүлгийн хөтлөгч Эллен Дженерс, сагсан бөмбөгч Леброн Жэймс, дуучин Тэйлор Свифт, Бейонсе нар гэхэд л дөрвөн оронтой тоо бүхий орлого олж жагсаалтыг удаалж байгаа ч тэр нь ихэнх хүмүүсийн сарын орлогоос харьцангуй их байна.