МАН-ын генсек Д.Амарбаясгалангийн хувь эзэмшдэг компаниуд ЖДҮХС-с зээл авсан нь илэрлээ
Улс төрийн хүрээнд төдийгүй нийгэмд хамгийн ихээр асуудал дагуулж байгаа ЖДҮ-ийн сонгон шалгаруулалт, санхүүжилт нэг ёсондоо өндрөө аваад байгаа. Эрх баригч МАН-ын гишүүд сайд нарын жагсаалтаар олонд ил болсон ЖДҮ-ээс санхүүжигчид өдөр хоногоор бус цаг, цагаар нэмэгдэх болсон. Тодруулбал,
Зам тээвэр, хөгжлийн яамны сайд Я.Содбаатар нь өөрийн эзэмшлийн “Эпато анарваан” ХХК нь 1.2 тэрбум төгрөгийн зээл,
Хүнс, хөдөө аж ахуй хөнгөн үйлдвэрийн сайд Б.Батзориг нь эхнэр Л.Отгонжаргалын “Тээвэр ачлал” ХХК нь 1.4 тэрбум төгрөгийн зээл,
Улсын Их Хурлын гишүүн Х.Болорчулуун нь өөрийн эзэмшлийн “Дорнод гурил” ХХК-д 950 сая төгрөг,
Улсын Их Хурлын гишүүн Г.Солтан өөрийн эзэмшлийн “Монгол Шаазан” ХХК-д 950 сая төгрөгийн зээл авсан гэх мэдээллүүд цацагдсан.
Мөн дээрх албан тушаалтнуудаас гадна УИХ-ын гишүүн Ж.Энхбаярын “Газар буудай” ХХК, Н.Учралын аавын “Хүннү” ХХК, Барилга хот байгуулалтын дэд сайд Ш.Лхамсүрэнгийн “Нүүдэлчин агро фирм” ХХК, Монгол Улсын Ерөнхий аудитор Д.Хүрэлбаатарын “Цэн стайл” ХХКтус тус Жижиг, дунд үйлдвэрлэлийг хөгжүүлэх сангаас хөнгөлөлттэй зээл авсан нь ил болоод байгаа юм. Тэгвэл энэ жагсаалт дахин үргэлжилж Монгол Ардын Намын Ерөнхий нарийн бичгийн дарга, НИТХ-ын төлөөлөгч Д.Амарбаясгалангийн хувь эзэмшдэг компани зээл авсан нь ил боллоо. Тодруулбал, ЖДҮХС-с 2017, 2018 онуудад онд зээл авсан компаниудын жагсаалтад Тайшир Өргөө, Агро Технологи Шижирт гэх компаниудын нэр орсон байна. Эдгээр компаниудын тус бүр 30 хувийг Монгол Ардын Намын Ерөнхий нарийн бичгийн дарга, НИТХ-ын төлөөлөгч Д.Амарбаясгалан эзэмшдэг хэмээн ХОМ-тээ дурьдсан байдаг. Тайшир Өргөө ХХК 375,000,000 төгрөгийн зээл авчээ. Жижиг дунд бизнес эрхлэгчдэд зориулагдсан зээлийг дундаас нь төрийн өндөр албан тушаалтануудын хувь эзэмшдэг эдгээр компаниуд хууль бусаар авсан нь илэрлээ. Хууль бусаар зээл авсан эдгээр төрийн өндөр албан тушаалтануудаас ХХААХҮЯ-ы сайд Б.Батзориг сайд хариуцлага хүлээн албан тушаалаасаа огцрохоо мэдэгдээд байгаа. Тэгвэл бусад гишүүд ямар хуулийн хариуцлага хүлээх вэ.
Уг нь бол Эрүүгийн хуулийн шинэчилсэн найруулгад энэ төрлийн гэмт хэргийг маш тодорхой зааж өгсөн байгаа. Эрүүгийн хуулийн 22.1-д эрх мэдэл, албан тушаалын байдлаа урвуулж ашиглах гэмт хэргийг зааж өгсөн байдаг. Алтан тушаалтан нь албан үүрэг, бүрэн эрхийн байдлаа урвуулан ашиглаж, өөртөө болон бусдад давуу байдал бий болгосон бол үүнийг эрх мэдэл, албан тушаалын байдлаа урвуулж ашиглах гэж үзнэ гээд заагаад өгчихсөн. Энэ төрлийн хэргийг улстөрд нөлөө бүхий этгээд үйлдэх юм бол хүндрүүлж авч үздэг. Улс төрд нөлөө бүхий этгээд гэдэг нь УИХ, Засгийн газрын гишүүнд хамаарна. Ийм албан тушаалтан энэ төрлийн хэргийг үйлдсэн нь тогтоогдвол нийтийн албанд томилогдох эрхийг нь 5-8 жил хүртэлх хугацаагаар хасч, торгодог. Мөн 2-8 жил хүртэлх хугацаагаар хорих ял шийтгэх үндэслэл болж өгдөг аж. Хуулийн дагуу эдгээр гишүүд улс төрийн хариуцлага хүлээхээс гадна хуулийн хариуцлага ч мөн хүлээхээр байгаа юм.