БНСУ-ын Христийн шашны Манмин чуулганы тэргүүн И Жэ Рок (Lee Jae-rock) 8 эмэгтэйг хүчирхийлсэн тул 15 жилийн хорих ял авчээ.

И Жэ Рок(Lee Jae-rock) нь  75 настай бөгөөд 130,000 орчим дагагчтай Христийн шашны Манмин чуулганы номлогч юм. Өнгөрсөн тавдугаар сард Ли Жэ Рок-д хүчирхийлүүлсэн гэж нийтдээ 8 эмэгтэй гомдол гаргаснаар түүнийг  баривчилжээ. Шүүх хурлаас түүнийг шалгах явцдаа нийт арав гаруй удаа хүчингийн гэмт хэрэг үйлдэж байсныг тогтоосон байна. 

Хохирогчид нь өөрсдийн итгэл үнэмшлээс болж түүнийг бурхан гэж үздэг байсан тул шаардсан зүйлийг нь хийхээс аргагүйд хүрч байсан гэж мэдүүлжээ. 

Тус улсын Христийн шашинд итгэгч нар цөөхөн хэдэн Христийн чуулгануудад харьяалагддаг тул, тус чуулганууд асар их хэмжээний хөрөнгө цуглуулсан байдаг аж. Манмин чуулганы хувьд 1982 онд ердөө 12 дагагчтай үйл ажиллагаагаа эхэлж байсан бол өдгөө 130,000 дагагчтай болтлоо өсжээ.

И Же Рок анх чуулганаа нээсний дараа, чуулганыхаа 3 итгэгчийг гэртээ дуудан, хүчирхийлэхийг завдаж байжээ. Энэ тухай бага наснаасаа эхлээд тус чуулганд явсан нэгэн хохирогч эмэгтэй “Би түүнийг эсэргүүцэж чадаагүй. Учир нь тэр бол бурхан. Өөрөөр хэлбэл, хаанаас ч илүү хүн шүү дээ” гэж хэвлэлийнхэнд хэлж байжээ.

Шүүгч Чан Мон Сан “Тэрээр номлолоороо дамжуулан өөрийгөө бурхан мэт ариун гэгээн хүн гэж ухуулж, хохирогчидийг түүндээ итгүүлэн,  улмаар аргагүй байдалд оруулдаг байсан” гэж үзжээ.

Харин И Жэ Рокийн өмгөөлөгч “Тэдгээр эмэгтэйчүүд сүмийн дүрмийг зөрчиж, чөлөөлөгдсөнийхөө дараа өшөө авахаар худал мэдүүлэг өгсөн” гэжээ. Гэсэн хэдий ч шүүх үнэнийг тогтоож ийнхүү 15 жилийн хорих ялаар шийтгэсэн байна.