АНУ-аас Оросод цөмийн зэвсгийн зөрчлөө арилгах 60 хоногийн хугацаа өглөө
АНУ-ын төрийн нарийн бичгийн дарга Майк Помпео мягмар гарагт хийсэн мэдэгдэлдээ ОХУ-ыг Хүйтэн дайны үед хийсэн цөмийн зэвсгийн түүхэн гэрээг зөрчиж байна гэж буруутгаад хэрэв 60 хоногийн дотор Москва уг зөрчлөө арилгахгүй бол Вашингтон мөн адил гэрээгээр хүлээсэн үүргээсээ татгалзах болно хэмээн анхааруулжээ.
1987 онд АНУ-ын ерөнхийлөгч Рональд Рейган болон ЗХУ-ын удирдагч Михаиль Горбачев нар дунд тусгалтай цөмийн пуужингаас татгалзах гэрээг үзэглэсэн юм. Тус гэрээний дагуу хоёр тал 500-5500 километрийн тусгалтай хуурай газрын ангиллын цөмийн зэвсэг цаашид эзэмшихгүй байхаар болсон билээ.
Майк Помпеогийн хувьд ОХУ-ыг цөмийн зэвсгийн хяналтын асуудалд хуурмагаар хандаж байна гэж үзсэний сацуу ойрын хугацаанд Оросын талаас үйлдсэн дэлхий дахины аюулгүй байдалд хор учруулахуйц зөрчлүүдийг мөн онцолжээ. Тухайлбал Гүрж, Украин, Сири улсууд дахь Оросын ажиллагаа, гадаад орны сонгуулийн үр дүнд нөлөөлөх явдал, тагнуулч Сергей Скрипалийн амийг хөнөөхийг завдсан хэрэг, саяхан Азовын тэнгист Украины хөлгүүдийг олзолсон явдал зэргийг тоочсон байна.
Тэрхүү 60 хоногийн хугацааг НАТО-ийн Европын гишүүн орнуудын хүсэлтийн дагуу өгч байгаа гэдгийг Помпео онцолсон бөгөөд "Үүнийг бид хэн хэндээ ашигтай тохиролцоо гэж бодож байна. Москваг бодлоо өөрчилнө гэдэгт найдаж байгаа" хэмээн өгүүлжээ.
Харин дээрх мэдэгдлийн хариу болгож ОХУ-ын гадаад хэргийн сайд Сергей Лавровын төлөөлөгч Мария Захарова "ТАСС" агентлагт өгсөн мэдээлэлдээ "Орос улс цөмийн зэвсгийн гэрээний нөхцөлийг тууштайгаар даган биелүүлж байгаа, үүнийг Америкийн тал мэдэж байх ёстой" гэжээ.