Ж.Мөнхбат: Шударга ёсны тухай ярьж байгаа гишүүд миний бланк дээр гарын үсэг зур, тэгээд тарах асуудлаа яръя. Ард түмнээрээ дүнгээ тавиулъя.
Ж.Бат-Эрдэнэ: Мөөгий гишүүн бланк дээрээ гарын үсгээ цуглуул, таръя яршиг. Тийм л хоншоортой юм бол дахиад сонгогдоод ороод ир. Бүгдээрээ огцоръё.
Л.Энх-Амгалан: Эрүүл саруулаар асуудалд хандмаар байна. Бүгдээрээ халдашгүй дархан эрхээсээ татгалзаад өнөөдөр өргөдлөө бичиж өгье. Тэгээд хуулийн байгууллагад шалгуулъя.
Д.Хаянхярваа: Өөрсдөөсөө ичиж байна. Бүгдээрээ сайн дураараа очиж шалгуулъя.
Настай хүн үхнэ үхнэ, хүүхнүүд сална сална гэж айлгадаг гэдэг шиг энэ парламентынхан сүүлийн үед тарна тарна гэж сүрдүүлдэг болж. Гэхдээ, яана вэ, хэн ч айхгүй. Бас та нараас өөр хэн ч хохирохгүй. УИХ тараа л биз. Гишүүдийн ам ангайх бүртээ хайр зарладаг ард түмэн лав хохирохгүй. Энэ УИХ-тай, хуралгүй ажлаа хийгээд, талхны мөнгөө олдог нь олж, олоогүй нь өлөн цөлмөн явж байгаа. Тиймээс дуугүй л тараад өг, түвэгтэй байна. Хийж бүтээсэн ажилгүй, шийдсэн асуудалгүй 75 хэрүүлчийг харахаар дургүй хүрээд байна. Төрийн ордны зөөлөн сандалд суучихаад өөр хоорондоо хэрэлдэж, татварын мөнгөнөөс идсэнээ ичих нүүргүйгээр тоочиж байгаа чинь гутмаар байна, тараад аль. Хахир өвлийн хүйтэнд наад ордныг чинь тойрон шүүрдэж байгаа цэвэрлэгчийн цалингаас суутгасан татварын мөнгөнөөс хумсалчихаад хэрэлдэхээс өөрийг хийхгүй байгаадаа ичээч ээ.
Бодохоор л дургүй хүрээд байгаа биз дээ. Ам амандаа таръя, таръя...хэнийг хохироох гээ вэ. Монголын төр та нарын тоглоом уу. Та нарыг хэн энд гуйж суулгаа вэ, дуугүй л тараад өг. Тэгж ярих юм бол та нар гуйж ирээд саналыг минь авч, энд суугаа биз дээ. Одоо тэгээд хэнийг хохироож, хэнд гайхуулах гээд галзуу ноход шиг аашлаад байгаа юм бэ.
Парламент мэтгэлцээний талбар, олон ургалч үзэлтэй байх нь зөв гэж үү. Яасан гоё зарчим вэ. Хуулийн төсөл дээр та нар ингэж мэтгэлцдэг билүү. Бүр хуралдаа ирж суудаг уу. Чуулганы хуралдааны ирц бүрдэхгүй, дарга чинь үйлээ үзээд үсээ зулгаагаад сууж байдаг нь худлаа юу. Тийм атлаа томилгоо, сандал ширээний асуудалд та нар ямар их уралцана вэ. Ямар их эрх ашигтай, хувийн сонирхолтой, яасан их өс хонзонтой хүмүүс вэ. Монголын төр, парламентын танхим та нарын шүлсээ үсчүүлэн дайрдаг хэрүүлийн талбар уу. Гишүүд ээ, хуралдааны танхимд орж ир, гишүүд ээ санал хураая гээд дарга чинь та нарыг гуйж түүдэг л юм байгаа биз. Ард түмэн та нарыг гуйхгүй ээ, зайгаа тавиад өг. Юу хийж бүтээчихээд, ямар гавьяа байгуулсан гэж тарна, тарна гэж сүрдүүлээд байгаа юм бэ. Төрийг хангалттай шимсэнийг чинь харлаа, сонслоо, үзлээ. Одоо юугаа идэх гээд уралцана вэ, зүгээр л тараад явцгаа.
Ард түмэн, ард түмэн гэж ярихаа ч боль. Бусдын нэр барьж дүр эсгэхийг чинь харах утгагүй байна. Бидний төлөө та нар юу ч хийгээгүй, хэрүүл хийж, шүлсээ л үсчүүлсэн. Тиймээс одоо мэдрэлийг минь амраахыг та нараас шаардаж байна, төрийг самрагчид аа. Худал дүр эсгэлтээс чинь, авах юмгүй хэрүүлээс чинь, шунаг сувдаг ашиг сонирхлоос чинь залхаж гүйцлээ, тараад аль. Инээдтэй, эмгэнэлтэй драмаа одоо төгсгөж үз.
М.Болд