Хятадын тэргүүн Ши ЖиньПин, ард түмний дуучин Пэн ЛиЮань хоёрын хайрын түүх
Хятад улс удаан хугацааны турш Барууны ертөнцөд хаалттай байсан нь улсынх нь тэргүүн хатагтайн талаар олон хүн мэдэхгүй байх нөхцөлд хүргэсэн байх боломжтой. Мөн тэд ямар ч сонин хэвлэлд ярилцлага өгдөггүй, хүний анхаарал татдаггүй, далд байдаг байсан юм. Харин энэ бүхнийг өнөөгийн удирдагч Ши ЖиньПиний гэргий, бүх ард түмний хайрт, “Хятадын нэрийн хуудас” болсон дуучин Пэн ЛиЮань өөрчилж чадсан юм.
Түүнийг бүр хүүхэд байхаас нь л эцэг эх нь дуучин болгохоор шийдэж хөгжмийн боловсрол олгосон байна.
Үнэхээр ч түүний сапран хоолой анхаарлын төвд байж дуучин бүсгүй тун удалгүй төрөл бүрийн хамтлагуудын урилгад дарагдаж эхэллээ. Ингээд бүсгүй Хятадын армийн эгнээнд элсэж, Шаньдуны цэргийн тойргийн дуу бүжгийн чуулгын гоцлол дуучин болов.
Тэдний чуулга улсынхаа хамгийн нэр хүндтэй тайзан дээр тоглож байснаар Пэн Лиюань тун удалгүй нэр алдарт хүрч баярын нэг ч концертыг алгасалгүй үзүүлбэрээ үзүүлдэг болсон юм.
Тэрээр урлагийн ертөнцөд нэгэнт орсон тул хувийн амьдралаа орхигдуулж эхэлж байлаа. Улмаар найзууд нь түүнийг хязгаар нутгийн жижигхэн хот Сямэний орлогч дарга байсан Ши ЖиньПинтэй танилцуулахаар зохион байгуулжээ. Эхлээд Пэн ЛиЮань түүнтэй уулзахаас татгалзаж байсан ч сүүлдээ нөхдийнхөө үгэнд автагдан “тэр ер бусын залуу”-г сонирхож эхэлсэн байна.
Ингээд тэрээр анхны уулзалтдаа нэг их бэлтгэж, гоёж гоодсонгүй, зүгээр л цэргийн дүрэмт хувцастайгаа очсон байна. Харин Ши Жиньпин уулзалтынхаа талаар “Би түүнтэй ярилцаад 40 минутын дараа гэхэд л миний ирээдүйн гэргий гэж бодсон” гэсэн байдаг бол Пэн Лиюань энэ уулзалтынхаа тухай хожим нь “Миний зүрх, энэ төгс залуу миний нөхөр юм биш үү хэмээн цохилж байсан” гэжээ.
Ингээд нэг жилийн дараа тэд гэрлэхээр шийджээ.
Гэвч хурим найр нэг их сүртэй болсонгүй. Хосууд хуримын батлах дээрээ гарын үсэг зураад, зураг авахуулж, найз нөхөд, хамт ажиллагсдаа оройн зоогонд уриад л өнгөрсөн юм. Харин зочид тэднийг хуримандд урьсныг, бас тэр үед алдар хүндийн оргилд байсан, ард түмэн “үлгэрийн цээнэ цэцэг” хэмээн хайрладаг гоо бүсгүй Пэн Лиюаньтай гэрлэж байгааг нь хараад ёстой алмайрч орхисон гэдэг.
Залуу хосууд барууныхан шиг бүтэн сараар бал сараа тэмдэглэж аялаагүй бөгөөд ердөө дөрөв хоног л хамт байсан гэнэ. Тэгээд л Пэн Лиюань дахиад концерт, аялан тоглолт гээд явчихдаг байж. Ингээд тэд 1992 онд охинтой болж Ши Минцээ хэмээн нэрлэжээ.
Пэн Лиюанийн амжилт үргэлжилсээр тэр эх орноороо төдийгүй гадаадад аялан тоглолт хийснээр бүр хошууч генерал цолонд хүрсэн юм.
Ши Жиньпин ч энэ хугацаанд бас цаг алдсангүй албан тушаал ахиж, хэд хэдэн нутагт томилогдоод амжсан байна. Түүний улс төрийн карьер ер бусын амжилттай өсөж 2007 он гэхэд таван жилийн дараа очих ёстой байсан улс орны удирдагчийн албан тушаалд нэр нь дурдагдаж эхэллээ. Үүнд харин гэргий Пэн Лиюань тийм ч дуртай биш байлаа. Мэдээж дуучин бүсгүй тайзан дээрээ үлдэж, өөрөө нөхрийгөө алдаршуулж байхыг хүссэн нь тэр.
2012 оны намар яг л ярьж байснаар Ши Жиньпин ХКН-ын Төв Хорооны Ерөнхий нарийн бичгийн дарга болсон бол дараа хавар нь БНХАУ-ын дарга болсон юм.
Хятадын удирдагчид өмнө нь гадаадад айлчлахдаа европын албаны хувцас өмсөж, заавал зангиа зүүдэг байсан бол одоо Пэн Лиюанийн санаачилгаар өөрчилж, барууны хэв загварыг хятадын үндэсний хувцасны элементүүдтэй хослуулах болжээ. Амстердамд хааны ордонд болсон хүндэтгэлийн зоог дээр БНХАУ-ын тэргүүн, гэргийтэйгээ хятадын уламжлалт үндэсний хувцастай ирсэн нь нэг их гайхмаар зүйл биш байсан юм.
2014 оны арван нэгдүгээр сард Бээжинд Ази номхон далайн эдийн засгийн хамтын ажиллагааны орнуудын дээд хэмжээний уулзалт болоход улс орны тэргүүнүүд, тэдний гэргий нарт Пэн Лиюань хятадын үндэсний загварын хувцас бэлтгэсэн байлаа. Өөрөө ч үүндээ сэтгэл хангалуун байсан юм.
Пэн Лиюань тайзан дээр дуулсан хэдэн арван жилдээ олны анхаарлыг хэрхэн татах, яаж итгэлийг нь хүлээх, эрхэмсэг, дэгжин харагдах шинжлэх ухааныг эзэмшсэн байна. Энэ нь ч улс орны тэргүүн хатагтай байхад нь тун зохиж байлаа.
Пэн Люанийн өөрийнх нь өнгө төрх, гадаад байдал, дипломат төлөв нь Хятадын өнгө төрхийг гадаадад бэхжүүлэхэд хувь нэмэр болж улс орныг илүү хүмүүнлэг харагдуулах болсон юм.
