Өмнөд Солонгосын зочид буудлуудад мянга гаруй үйлчлүүлэгчийг нууц камераар бичиж байсан нь илчлэгджээ
Өмнөд Солонгосын зочид буудлуудад 1600 гаруй үйлчлүүлэгчдийг өрөөнд суурилуулсан нууц камераар бичиж live-stream хийн хэрэглэгчдэд төлбөртэй үзүүлсэн хэрэг ил болсныг "CNN" мэдээлжээ.
Уг хэрэгтэй холбогдуулан хоёр эрэгтэйг баривчилсан бөгөөд дахин хоёр этгээдийг шалгаж байгааг Солонгосын цагдаагийн газраас мэдээлсэн байна.
Тус улсын нийт 10 хотын 30 зочид буудал дахь 42 өрөөнөөс одоогоор нууц камер илрүүлээд байгаа аж. Тэдгээр нь ихэвчлэн жижиг "мотел"-ууд, дэн буудлууд юм байна. Буудлуудын эзэмшигчид уг хэрэгтэй холбогдсон баримт байхгүй байгааг цагдаагийн газраас мөн мэдээлжээ.
Нууц камерууд өрөөн доторх зурагтын хүлээн авагч, ханын розетка, үс хатаагч сэнсний суурь зэрэгт суурилуулагдсан байсан бөгөөд гэмт этгээдүүд бичлэгийг өөрсдийн сайтдаа шууд цацаж байсан аж.
Сайт нь 4000 гишүүнтэй, хэрэглэгчид хэрэв бичлэгийг хадгалах, дахин үзэхийг хүсвэл сарын 44.95 ам.долларын хураамж төлдөг байжээ. 2018 оны арваннэгдүгээр сараас энэ сар хүртэлх хугацаанд сайтын эзэмшигчид 6000 гаруй ам.долларын ашиг олсныг Солонгосын цагдаагийн газрын цахим аюулгүй байдлын төвөөс мэдээлсэн байна.
Өмнөд Солонгосын нийгэмд иргэдийн хувийн амьдралыг нууц камераар бичих явдал гол асуудлуудын нэг болдог. 2017 онд тус гэмт үйлдлийн золиос болсон гэсэн 6400 гаруй гомдол, мэдүүлэг цагдаагийн газарт ирж байжээ.
Өнгөрсөн жил Сөүл хотын гудамжуудад эмэгтэйчүүд хэдэн арван мянгаараа цуглаж, нууцаар бичлэг хийх асуудлыг төрөөс анхааралдаа авахыг шаардан жагссан билээ.