Ерөнхийлөгч Дональд Трампыг 2016 онд сонгуульд өрсөлдөхдөө ОХУ-тай хуйвалдаж, хамтран ажилласан эсэхийг тогтоох зорилготой шалгалтын үр дүнг АНУ-ын ерөнхий прокурор Уилльям Барр ням гарагийн орой конгресст танилцуулжээ.
Шалгалтыг хоёр жил гаруй хугацаанд гардан гүйцэтгэсэн тусгай төлөөлөгч Роберт Мюллерийн тайлагнаснаар 2016 онд Трампын сонгуулийн сурталчилгааны баг Оростой хуйвалдсан, хамтран ажилласан ямар нэгэн баримт олдоогүй, ингэснээрээ Ерөнхийлөгч Трамп хууль зөрчсөн үйлдэл гаргаагүй болохыг ерөнхий прокурор мэдэгдсэн байна.
Ерөнхийлөгч Трамп энэ талаар "Бүрэн цагаадлаа. Хуйвалдаагүй. Хууль зөрчөөгүй" хэмээн жиргэжээ.
Гэхдээ конгресс дахь Ардчилсан намынхан Мюллерын тайланг бүрэн эхээр нь ил болгохыг шаардсан бөгөөд ерөнхий прокурорын дүгнэлт гарсан ч гэсэн Ерөнхийлөгч үнэхээр гэм буруугүй эсэх нь тодорхой бус байна гэжээ.
Конгресст танилцуулсан Мюллерийн тайлан нь нийт 4 хуудас урттай, Уилльям Баррын дүгнэлтээр баталгаажсан бөгөөд "Трампын сонгуулийн баг Хиллари Клинтоныг ялахын тулд Оростой хамтран ажилласан уу?" гэсэн гол асуулт дээр тулгуурласан байсан аж.
Трампын гэм буруугүй нь ийнхүү нотлогдсоноор Ардчилсан намын 2020 онд болох Ерөнхийлөгчийн сонгуульд иргэдийн саналыг өөрсдийн зүг эргүүлэх найдлага улам бүрхэг болж байгааг "Associated Press" агентлаг онцолжээ.
19 хуульч, Холбооны Мөрдөх Товчооны 40 албан хаагчийн туслалцаатай явагдсан Роберт Мюллерийн шалгалт нийт 674 хоног үргэлжлэхдээ 30 сая ам.долларын зардал гаргаж, 27 хүнийг яллаж, долоон хүнд шийтгэл оногдуулсан байна.
