Засгийн газраас “Үндсэн хуульд нэмэлт өөрчлөлт оруулах” төслийг хэлэлцэхээр тогтсонтой холбогдуулан Иргэний Зориг Ногоон намаас шаардлага хүргүүлэхээ мэдэгдлээ. Үндсэн Хуулийн 6.2-д “Монгол Улсын иргэдэд өмчлүүлснээс бусад  газар, түүнчлэн газрын хэвлийн, түүний баялаг, ой, усны нөөц, ан амьтан төрийн өмч мөн” гэсэн заалт байдаг. Тэгвэл энэхүү төсөлд  “Төрөөс байгалийн баялгийг ашиглахдаа тэгш байдал, шударга ёс, үндэсний эдийн засгийн аюулгүй байдал, тогтвортой хөгжлийг хангах зарчмыг баримална” гэсэн заалт нэмэхээр тусгасан байна. Үүнийг Иргэний Зориг Ногоон намаас  Монголын ард түмнийг  туйлдуулж, баялгийн эздийн хөрөнгийг, завшсан луйврын тогтолцоог хэвээр хадгалж байна. Үндсэн Хуулийн 6.2-д заасан “төрийн өмч” гэсэн хэсгийг “ард түмний өмч” гэж солиход улс төрийн булхай, луйвар үгүй болж, иргэд баялгаа эзэмшинэ гэж үзэж байгаа юм.

 Иргэний Зориг Ногоон намын Дарга Ц.Ганхуяг “Үндсэн Хуульд нэмэлт өөрчлөлт оруулах тухай асуудал бүх ард түмний санал асуулгын үндсэн дээр явагдах ёстой. Энэхүү нэмэлт өөрчлөлтийг хийвэл ядуу иргэд, баян төртэй байх бодлого үргэлжилэх болно. Угтаа иргэн нь баян байж, улс нь баян гэж хэлэгдэх учиртай. Гэтэл Үндсэн Хуулийн Нэмэлт Өөрчлөлт гэх баримт бичигт нам бүлэглэлийн эрх мэдлийн төлөөх улайрал нэвт шингэж, ард түмний эрх ашиг зөрчигдөж байна. “Төрийн өмч” нэрэн дор байгалийн баялаг нь мөнгө угаалт, авилга хээл хахуулийн үндэс болох нөхцөл бүрэлдэх  гэж байна” гэсэн юм.

Хэрэв ард түмний өмч болвол хүссэн хүн баялгийг эзэмшиж, дураараа зарцуулна гэсэн асуудал гарч ирнэ. Энэ  талаар тус намын Ерөнхий нарийн бичгийн дарга С.Батбаатараас асуухад “ Үүнд зохицуулалт хийгээд Органик хуулиар шийдэж болно. Жишээ нь  нэг аймгийн Засаг дарга  төрийн мэдлийн газрыг лиценз хэлбэрээр  хэн дуртайд нь  өгч байна.  Харин ард түмний өмч болсноор Засаг дарга заавал иргэдтэйгээ зөвшилцөж байж, шийдвэр гаргана. Хэрэв ард түмний нэр дээр шилжүүлбэл  төрийн төлөөлөл дур мэдэн  шийдэж чадахгүй” хэмээлээ.

Намын зүгээс уг саналыг дэмжихийг нийт ард түмэн, улс төрийн хүчин, иргэний байгууллагуудаас уриаллаа.