Уул уурхайг хумиж, тусгай хамгаалалтын газрыг нэмэгдүүлнэ
Ерөнхий сайд У.Хүрэлсүх хууль бусаар үйл ажиллагаа явуулж буй уул уурхайн компаниудтай “дайн” зарлаж, тусгай зөвшөөрлийг нь цуцлах шийдвэрийг эхнээс нь гаргаад буй. Түүний эл шийдвэр олон нийтэд таалагдаад зогсохгүй ирэх 2020 оны УИХ-ын ээлжит сонгуулийн пи ар болж чадсан гэдэгтэй маргах хүн үгүй биз ээ. Энэ сарын 21-ний байдлаар Ц.Мянганбаяр тэргүүтэй эрхмүүдийн эзэмшилд очоод байсан уул уурхайн тусгай зөвшөөрлийг цуцлах шийдвэрийг гаргасан юм. Угтаа бол "Монгол газар" компанийн захирал тэрбээр хэдийнэ дампуурлаа зарлаж, дансаа улайсгасан талаар мэдэгдсэн байдаг. Дампуурал зарлах замаар өр зээлээ төлөхгүй гэж гэдийсэн тэрбээр уул уурхайн тусгай зөвшөөрлүүдээ нууц халаасандаа сэм хийгээд амжсан юм. Тиймдээ ч өнөөг хүртэл Архангай аймаг дахь тусгай зөвшөөрөл бүхий талбайгаа бусдад түрээслэх замаар ашиг олж, санхүүгээ хангадаг байсан гэх.
Түүний эзэмшилд нийтдээ 8400 гаруй га талбай бүхий тусгай зөвшөөрөл байсан гэхээр Архангай аймгийн Цэцэрлэг хотыг бараг 2 дахин нугалсантай дүйцэхүйц том хэмжээтэй газар юм.
Азаар Ерөнхий сайдын гаргасан дээрх шийдвэр Ц.Мянганбаяр тэргүүтэй хүмүүсийн тархин дундуур саваад авахтай адил зүйл болов.
Тэгвэл үүний хажуугаар улсын тусгай хамгаалалттай газрыг 1,3 сая орчим га-гаар нэмэгдүүлах шийдвэрийг энэ сарын 21-ний Засгийн газрын ээлжит хуралдаанаар хэлэлцэн баталлаа. Тодруулбал, байгалийн бүс, бүслүүрийн онцлог хэв шинж, унаган төрх, байгалийн өвөрмөц тогтоц, түүх, соёл, шинжлэх ухаан, танин мэдэхүй, экологийн хувьд онцгой ач холбогдол бүхий зарим газар нутгийг улсын тусгай хамгаалалтад авах, хилийн заагт өөрчлөлт оруулах тухай УИХ-ын тогтоолын төслийг хэлэлцэн дэмжээд УИХ-д өргөн мэдүүлэхээр тогтлоо.
Үүнд,
- Онон Балжийн байгалийн цогцолборт газрын хилийн заагт Хэнтий аймгийн Дадал, Биндэр сумын зарим хэсгийг хамруулан өргөтгөлөөр,
- Дэвэлийн арлын байгалийн нөөц газрын хилийн заагт Увс аймгийн Ховд, Бөхмөрөн сум, Баян-Өлгий аймгийн Ногооннуур сумын нутагт орших Ачит нуурыг хамруулан өргөтгөж байгалийн цогцолборт газрын ангиллаар
- Завхан аймгийн Дөрвөлжин сум Хомын талыг байгалийн цогцолборт газрын ангиллаар
- Хэнтий аймгийн Батширээт, Биндэр сумын нутагт орших Гутайн даваа-Хөмүүл голын эхийг байгалийн цогцолборт газрын ангиллаар,
- Баянхонгор аймгийн Галуут сумын нутагт орших Хан уул орчмын газрыг Хангайн нурууны байгалийн цогцолборт газрын өргөтгөлөөр,
- Алтан хөхий уулын байгалийн нөөц газрын заагт Ховд аймгийн Мянгад сумын зарим хэсгийг хамруулан өргөтгөлөөр
- Баянхонгор аймгийн Гурванбулаг, Завхан аймгийн Отгон сумын нутагт орших Хөхнуур-Бумбат орчмын газрыг байгалийн нөөц газрын ангиллаар
- Хэнтий аймгийн Өмнөдэлгэр, Батширээт, Биндэр, Баян-Адарга сумын нутагт орших Хурх хүйтний хөндий орчмын газрыг байгалийн нөөц газрын ангиллаар
- Баянхонгор аймгийн Галуут сумын нутагт орших Баянхонгор хайрхан уулыг дурсгалт газрын ангиллаар улсын тусгай хамгаалалтад авахаар тусгажээ.
Мөн төслөөр Орхоны Хөндийн байгалийн цогцолборт газрын хязгаарлалтын бүс дэх Өвөрхангай аймгийн Бат-Өлзий сумын төв орчмын 3090.16 га газрыг тусгай хамгаалалттай газар нутгаас чөлөөлж хилийн заагт өөрчлөлт оруулахаар баталлаа. Ингэснээр зургаан аймгийн 13 сумын нутаг дэвсгэрийг хамарч байгаа бөгөөд Улсын тусгай хамгаалалтад авснаар талбайн хэмжээ 1,298.047 га-гаар буюу нийт нутаг дэвсгэрт эзлэх хувь 0.83 хувиар нэмэгдэх юм байна. Тодруулбал, дээрх газрыг тусгай хамгаалалтай газарт шинээр болон өргөтгөлөөр авснаар 32,759, 268 га буюу Монгол Улсын тусгай хамгаалалттай нийт газар нутгийн 20,94 хувийг эзлэх юм байна.