Монголчуудыг өдөржин унтуул!
Шөнө нь архидуул!
Бусад цагт нь дэмий балай, хог, хэрэгцээгүй зүйлд зогсоо зайгүй автуул!

Эмс охидийг нь харийхантай хавьтуул!
Эрчүүдийг нь харин өрөнд оруул эсвэл шоронд явуул!

Үлдсэнийг нь архинд живүүл!
Алинд нь ч автахгүй байгаануудыг нь харьд гарга!
Болж өгвөл тэнд нь харлуул!

Хүндлэл, өргөмжийг мартуул, хөгшид настангуудыг адлуул!
Хүүхдүүдийг дураар нь эрхлүүл!

Алт мөнгө долларыг тахин шүтүүл
Төрийн бүхий л эрх мэдлийг шуналт луйварчдын гарт өг
Эд хөрөнгө, эрх мэдэл, өнгө мөнгийг шүтүүлж
Эрдэм мэдлэг, эх орныг умартуул
Боловсролыг үнэгүйдүүлж биеийн хүчийг магт

Ардчилал хүний эрх, эрх чөлөөг өдөр шөнөгүй сурталчил
Архи тамхи, аллага хядлага, садар самууныг ч ялгаагүй

Төрийн албыг нь самууруул!
Түмний тархийг нь хамууруул!
Ардыг дарамтал, татвар гувчуурыг нэмүүл!
Намаар талцуулж хуваа!

Ламаар тариндаж унтуул!
Шашинаар мунхруулж төөрөгдүүл!
Зугаа цэнгэлд умбуулж живүүл
Залуусыг шалиг явдалд завхайруул!
Шоу цэнгээнд донтуул!

Бие, сэтгэл, оюун бодлоор ядууруул!
Хоёр идүүлэхгүй хоосон хонохгүй амьдруул!
Хожил хайж, шуналд идүүлэн сохруул!
Хошин шогоор маазруул!
Муу бүхнийг дэмжиж цэцэглүүл!

Эх орончдыг нь элэглэн шоол эсвэл гүтгэж муул!
Зоригийг нь үхүүлж зорилгоос нь няцуул!
Гудамжны “эх орончдыг” дураар дургиул!
Гутамшигтай олныг сэвэн дорьгуул!

Бичиг үсгийн дүрмийг жил тутам сольж
Хүн бүр дураар бичдэг холион бантан болго
Эцэст нь англи хэлийг л бүгд шүтэж суралцах болно

Үүх түүхийг нь гутаан доромжилж мартагнуул
Аймаг хот, гудамж талбай, яамдын нэрсийг тогтмол өөрчил
Үндэс угсааг нь үгүйсгэж басамжил!
Үр дүнгүй хэрүүлээр үргэлжийн мөнхөд талцуул…

Олон улсын гэрээ хэлэлцээрт уяж хөдөлгөөнгүй болго
Хууль дүрэм үүргийг нь үргэлж сануулж айлга тулга
Хуурамч хомсдолд байнга оруул, 
Худалдах зүйлгүй болгож хоосруул
Өрөнд унагааж, өвчинд шаналуул 
Өвдөг сөхрүүлж, өмхийрч ялзруул 
Их удахгүй энэ улс устан байхгүй болно!