Эсэргүүцэгчид жагсаал цуглааныг хориглосон цагдаагийн шийдвэрийг үл тоон жагсаж улмаар цагдаагийнхантай мөргөлджээ. Цагдаагийнхан жагсаалд оролцогчдод тэмдэг тавьж, дараа нь баривчлах зорилгоор даралттай усаар шүршигч буундаа цэнхэр өнгийн будагч бодис хийсэн байна. Эх газрын Хятадаас санал болгосон хэрэгтэн шилжүүлэх хуулийн төслөөс үүдэлтэй эсэргүүцлийн уг жагсаал цуглаан 13 дахь долоо хоногтоо үргэлжилж байна.   

Жагсагчид болон цагдаагийнхны хоорон дахь мөргөлдөөн хурцдах үед тэд жагсагчдын эсрэг цэнхэр өнгийн будагчаар дүүргэсэн усан буунуудыг ашиглах болжээ. Цагдаагаас жагсаал цуглаан хийхийг хориглосон ч Хонконгийн ард иргэд Бямба гарагт олон нийтийг хамарсан эсэргүүцлийн цуврал жагсаалыг 13 дахь долоо хоногтоо хийлээ. Эсэргүүцлийн жагсаал нь 6-р сард эх газрын Хятадаас санал болгосон хэрэгтэн шилжүүлэх хуулийн төслийг эсэргүүцсэнээр эхэлсэн юм.

Бямба гарагт жагсагчид болон цагдаа нарын хооронд олон удаа мөргөлдөөн гарч цагдаагийнхан жагсагчдын эсрэг нулимс асгаруулагч хий, усан буу хэрэглэсэн бол жагсагчид цагдаа нар руу тоосго, Молотовын коктейль буюу шатаах шингэнтэй шил шидэн цагдаагийн хамгаалалт дотор гал тавьж байсан ажээ.        

Цагдаагийнхан усан буундаа цэнхэр өнгийн будагч бодис хольж жагсагчдын эсрэг хэрэглэснээс үүдэж зам талбайнууд цэнхэр уусмалаар бүрхэгдсэн байна. Түүнчлэн жагсагчдыг будагтай  усаар шүршин тэмдэг тавьж дараа нь баривчлах зорилгоор зорилготой гэж мэргэжилтнүүд үзэж байна.        

“Хонконгийн цагдаа анх удаагаа цэнхэр өнгийн будагч бодис бүхий усан буу ашиглалаа. Үүний зорилго нь жагсаалд оролцогчдод тэмдэг тавьж улмаар баривчилгаа явуулахад оршиж байна. Кэрри Лам өөрийн кабинетдаа “Бүгдийг нь баривчилж шоронд хийнэ” хэмээн хэлсэн байна. Тэрбээр хэлснээ хэрэгжүүлж байгаа нь энэ бололтой” гэж Жэйсон Нг хэмээх иргэн Твитертээ мэдээлж зураг тавьжээ.

Мөн Энтони Дапиран гэх хүн “Усан буунууд жагссан олны эсрэг цэнхэр бодисыг шүршиж байгаа нь” гэсэн тайлбар бүхий зурагтай жиргээг Твитертээ оруулсан байна.

Баасан гарагт буюу Бямба гарагийн жагсаалын өмнө жагсагчдын хэд хэдэн нэрд гарсан  идэвхтэй гишүүдийг баривчилсан ч 2 хүнийг дараа нь барьцаагаар суллажээ. Баривчлагдсан идэвхтнүүдийн нэг Агнес Чоу мөн цэнхэр уусмалаар шүршиж буй зургийг Твитертээ нийтэлсэн юм.

Өнгөрсөн долоо хоногт Хонконгийн цагдаагийн газраас 86 эсэргүүцэгчийг, тэр дундаа 12 настай нэг хүүхдийг баривчилсан хэмээн мэдэгджээ.

Харин энэ долоо хоногийн эхээр гарсан мэдээнд Бээжин 13 долоон хоногийн өмнөөс энэхүү эсэргүүцлийн жагсаал тэмцлийг үүсгээд буй хэрэгтэн шилжүүлэх хуулийн төслийг бүр мөсөн буцаан татахаас татгалзсан тухай мэдээлжээ.