Хятадад 2010 оноос хойш иймэрхүү авлигач, хулгайч 10 мянган төрийн албан хаагчийг буудаж устгасан байдаг. Ийм ч учраас урд хөрш өнөөдөр эдийн засгийн чадвараараа дэлхийн №1 гүрэн болох гэж байна.
Нийслэлийн нийтлэг үйлчилгээний газрын дарга Ш.Одончимэг, ерөнхий нягтлан бодогч Д.Энхжаргал нарыг АТГ-ын мөрдөн шалгах хэлтсийнхэн 2017 оны есдүгээр сард саатуулж, “хангарьд” ордон дахь албан өрөөнд нь нэгжлэг хийсэн нь тухайн үедээ олны анхаарлыг татаж байв. Уг хэргийг мөрдөгчид хоёр жил орчим шалгаж, эдийн засгийн шинжээчдээр дүгнэлт гаргуулан, хохирлын хэмжээг тооцуулж, улмаар яллах дүгнэлт үйлдүүлэн шүүхэд шилжүүлэх саналаа илэрхийлэн НПГ-т хүргүүлжээ. АТГ-ынхан 2017 оны есдүгээр сарын 19-нд дээрх газрын дарга нарын албан тасалгаанд нэгжлэг хийхдээ санхүүгийн бичиг баримтууд, нэлээд их хэмжээний бэлэн мөнгө хураан авсан байдаг.
ННҮГ-ын дарга Ш.Одончимэг, ерөнхий нягтлан бодогч Д.Энхжаргал нарыг 2012-2017 онд албан тушаалаа урвуулан ашиглаж, өөрсдийн хамаарал бүхий есөн компанид бараа, материал нийлүүлсний төлбөр гэх мэтээр хуурамч баримт бүрдүүлж, их хэмжээний хөрөнгө завшсан хэмээн буруутгасан. Түүнчлэн үндэслэлгүйгээр хөрөнгөжсөн, ажилчдынхаа нэр дээр орон сууц, гарааш, оффис худалдан авсан, байгууллагадаа ажилладаггүй хүний нэрээр цалин авсан, нярвуудынхаа хувийн дансаар 500 гаруй сая төгрөг урамшуулал хэмээн шилжүүлж өөрсдөө завшсан хэрэгт холбогдсон талаар бид цаг тухайд нь мэдээлж байсан билээ.
ННҮГ нь нийслэлийн засаг захиргааны удирдах байгууллагууд, хэрэгжүүлэгч агентлагуудад үзүүлэх цэвэрлэгээ үйлчилгээ, засвар, арчлалт, байрнуудын инженерийн шугам сүлжээ (цахилгаан, дулаан, цэвэр, бохир ус, цахилгаан шат) гэх мэт өдөр тутмын ажиллагааг хариуцах чиг үүрэгтэй ажилладаг. Гэвч тэрбээр үүнд төсөвлөсөн хөрөнгөөс хуурамч баримтаар завшиж байсан бөгөөд хууль сахиулах байгууллагын эх сурвалжууд “ННҮГ-ын дарга Ш.Одончимэг, ерөнхий нягтлан бодогч Д.Энхжаргал нар нь албан тушаалаа урвуулан ашиглаж, үндэслэлгүй хөрөнгөжсөн, 2012-2017 онуудад өөрсдийн хамаарал бүхий есөн компаниар дамжуулан 1.5 тэрбум төгрөг завшсан байж болзошгүй гэх хэргийг яллах дүгнэлт үйлдүүлж шүүхэд шилжүүлэх болсон” хэмээн өгүүллээ. Дээрх хүмүүсийг ах, дүүсийнхээ буюу хамаарал бүхий хүмүүсийнхээ “Үүлэн сондор”, “Үүлэн арвижих”, “женерал дата”, “Найртын гол”, “Богадачахэ”, “Эко жолоо”, “Эко овоо” гэх зэрэг компанийн дансаар 100 гаруй удаагийн үйлдлээр 1.5 тэрбум төгрөгийг шилжүүлэн авсан гэж буруутгаж байгаа аж.
DMNN
