Япончууд цөмийн хаягдалтай усаа Номхон далай руу асгаж магадгүй
Фүкүшимагийн Атомын Цахилгаан Станц бохирдсон усаа далайд цутгах төлөвлөгөөтэй байгаа талаар Японы байгаль орчны сайд мэдэгдлээ. Учир нь станцын нөөцлөх орон зай 2022 онд дуусах аж. Энгийнээр тайлбарлавал, хайлсан реакторыг хөргөхөд ашигладаг сая гаруй тонн ус аварга том саванд хадгалагдаж байжээ.
Загасчид энэ санааг эрс эсэргүүцэж байгаа боловч олон эрдэмтэд үүнийг эрсдэл багатай гэж мэдэгдсэн байна. Гэхдээ Засгийн газар эцсийн шийдвэрээ хараахан гараагүй байгаа юм.
2011 онд газар хөдлөлт, цунамигийн улмаас үүссэн устөрөгчийн дэлбэрэлтээс үүдэж Фүкүшимагийн цахилгаан станцын реакторын барилга эвдэрч гурван реактор хайлжээ. Улмаар Японы засгийн газар уг газрыг олон арван жилийн хугацаанд цэвэрлэх үйл ажиллагааг зохион байгуулахаар шийдсэн байна.
Сүүлийн 8 жилийн турш эвдэрсэн реакторын барилгаас өдөр бүр ойролцоогоор 200 тонн цацраг идэвхт ус шахагдаж байна.
Цацраг идэвхт изотопын ихэнхийг нарийн төвөгтэй шүүлтүүрийн процесс ашиглаж устгасан боловч нэг тритий изотопыг авч хаях боломжгүй тул усыг 2022 он гэхэд дүүргэх асар том саванд хадгалжээ.
Номхон далайд ус цутгах төлөвлөгөө олон жилийн өмнөөс эхэлсэн бөгөөд Байгаль орчны сайд Ёшиаки Харада одоо уг ажлыг дэмжиж байгаагаа мэдэгдсэн юм.
Түүнчлэн олон эрдэмтэд Номхон Далайн уудам талбай усыг хурдан шингэлнэ гэж мэдэгдэж, тритий нь хүний болон амьтны эрүүл мэндэд маш бага эрсдэл учруулж байна гэжээ.
Гэхдээ ВВС-ийн Токиогийн сурвалжлагч Руперт Уингфилд Хейс энэ маргаантай асуудал биелэх боломжгүй болохыг мэдэгдсэн юм.
Учир нь загасчид үүнийг эрс эсэргүүцэж байгаа бөгөөд энэ нь Өмнөд Солонгосын засгийн газар болон Японы харилцааг улам бүр сүйтгэх магадлалтай ажээ.
Гэхдээ олон улсын цөмийн энергийн агентлаг Япон бохирдсон усны асуудлаа яаралтай шийдэх хэрэгтэй гэж болохыг сануулсан байна.