Хонконгийн тэмцэгчид 9-р сарын 11-ний халдлагын дурсгалд зориулан тэмцлээ нэг өдөр өнжлөө
Хонконгийн идэвхтнүүд 2001 оны 9-р сарын 11-ний өдөр АНУ-ын Нью-Йорк хотод болсон халдлагыг дурсаж 1 өдрийн хугацаанд эсэргүүцлийн хөдөлгөөнөө зогсоосныг "Ройтерс" мэдээлжээ. Түүнчлэн Хятадын төрийн өмчийн нэгэн сонинд тэдний тэмцлийг "терроризм"-ын шинж чанартай гэж дүгнэсэнд энэ үйлдлээрээ хариу барьсан аж.
Хонконгийн иргэд эх газрын Хятад руу ялтан шилжүүлэх хууль тогтоомжийг эсэргүүцэж, түүнчлэн Бээжин дэх коммунист удирдагчдыг хотыг орхихыг уриалан хэдэн сарын турш хурц тэмцэл өрнүүлж байгаа юм.
"Засгийн газрын эсрэг жагсагчид 9-р сарын 11-нд Хонконгт хий дамжуулах хоолой дэлбэлэх зэргээр томоохон террорист халдлага хийхээр төлөвлөж байна" гэж "China Daily" сонин Нью Йорк дахь ихэр цамхгуудыг дайралтад өртөж байх үеийн зургийн хамтаар нийтэлсэн нь тэмцэгчдийн дургүйцлийг улам төрүүлсэн аж.
Хонконгийн удирдагч Кэрри Лам ялтан шилжүүлэх хуулийн төслийг буцаан татна гэж мэдэгдсэн боловч Хонконгийн олон иргэд Бээжинг Азийн санхүүгийн төвийн бие даасан байдлыг тасралтгүй сүйтгэж байгаад санаа зовниж байгаа юм.
Харин Хятад улс үүнд АНУ, Их Британи болон бусад орнууд хөндлөнгөөс оролцож, үймээн самууныг өдөөсөн гэж буруутгаж байгаа аж.
Түүнчлэн "Энэ хуурамч мэдээ гэдгийг бид мэдэхийн тулд баримт шалгах шаардлагагүй." гэж 24 настай эсэргүүцэгч болох Майкл China Daily-ийн нийтлэлийн талаар санал бодлоо илэрхийлжээ. Мөн тэрбээр "Төрийн хэвлэл мэдээллийн хэрэгсэлд огтхон ч итгэх хэрэггүй. Харин оронд нь WhatsApp эсвэл найз нөхдөөсөө мэдээлэл авсан нь дээр" гэж хэлжээ.