Өнөөдөр хотын дарга болон бусад нийслэлийн удирдлагуудаар хэдэн зүйлсийг хийлгүүлж үзүүлмээр байна. Ер нь тэгээд амьдралаас тасарсан дарга нар асуудлын шийдлийг олно ч гэж юу байхав.

1. Хүүхдийн тэргэн дээр хүүхдээ суулгаад дэлгүүр орчихоод ир. Улаанбаатар хотод явган хүний зам бараг л байдаггүй. Ялангуяа орон сууц дундуур хүүхдээ тэргэн дээр суулгаад авч явах ямар ч нөхцөлгүй. Тэд нэг бол машинд дайруулна. Нэг бол маш муухай замаар хүүхдийнхээ тархийг доргиож, тэргээ эвдэлнэ.
2. Өндөр өсгийттэй эмэгтэйтэй 2 км газар алхчих. Үгүй ээ, хамгийн энгийнээр тансаг машин хөлөглөдөг эхнэрүүдээ дагуулаад хотын аль хэсгээр ч хамаагүй 2 км алхаад үз л дээ. Тэр эмэгтэйн хөл яаж өвдөх бол. Ямар муухай замаар яаж алхах бол? Гэхдээ мөнгөтэй хүмүүс өмсөж яваа өндөр өсгийтийнхөө үнэд л гаслах байх л даа...
3. Ажлаасаа өвөл алхаад харь. Улаанбаатар хотын өвөл хэр хүйтэн дээр нь хэр утаатай байдгийг бүгд л мэднэ. Гэхдээ утаанаас хол амьдардаг, тусдаа жолоочтой машинаа халаалгаад байж байдаг, дохиогоо асаагаад түгжрэлгүй давхидаг дарга нар юу ч мэдэхгүй л дээ. Харамсалтай нь, бодит амьдрал дээр хар утаанд чихээ хөлдөөх шахам алхаад явдаг хүмүүс зөндөө л бий. Тийм байхад боломжтой хэсэг нь өр зээл тавиад ч хамаагүй машинтай болохыг л эрмэлзэнэ шүү дээ.
4. Хоёр жаахан хүүхэдтэй өвөө эмээгийнх рүүгээ оч. Хэвлэл мэдээллийн хэрэгслүүдээр хүмүүсийг нийтийн тээврийн хэрэгслээр зорчиж байхыг түлхүү уриалах болсон. Цагаа тулаад 2-3 нялх хүүхэдтэй хотын төвөөс хол байдаг өвөө эмээгийнх рүүгээ очих ямар хэцүү гэж санана. Дээр нь ханиад томуу, халдварт өвчин ихтэй энэ нийгэмд ямар гээчийн хачин заваан юмаа сурталчлаад байдаг юм бэ? Адаглаад нийтийн тээвэр нь олон тоогоор, сул чөлөөтэй явдаг бол яахав гэхсэн. Гэтэл одоо автобуснууд ачааллаа дийлэхгүй зарим буудал дээрээ ч зогсохгүй адуу, мал ачиж яваа юм шиг л замын хөдөлгөөнд оролцож байгаа шүү дээ.

Энэ мэтчилэн тууз хайчилж, мэргэжилтнүүдээ загнахаас өөрийг хийдэггүй дарга нараар хийлгэх зүйл мундахгүй их байна. Өөрсдөө хөрсөн дээрээ буусныхаа дараа хот төлөвлөлт, замын түгжрэл гэх мэт асуудлын шийдлийг мэддэг юм шиг ярих хэрэгтэй. Яагаад түгжрээд байгаа шалтгаан ерөөсөө л ойлгомжтой шүү дээ. Тэрийг ойлгохгүй байж нэг л их машинтай хүмүүсийг буруутгаад, цэцэрхээд хоорондоо мэтгэлцээд байх ер нь ямар хэрэгтэй гэж? Явган хүний гоё замтай, нийтийн тээвэр нь сийрэг олон тоогоор явдаг бол хэн л түгжрээд цагаа барахыг хүсэхэв. Дээр нь утааны асуудлаа шийдээд адаглаад метротой болох шаардлагатай байна.

Тэгэхээр өөрсдөө машин унахаа больж, нийтийн тээврээрээ зорчдог болчхоод ард иргэдээ шүүмжлэх ёстой мэт санагдана. Чадахгүй бол чаддагт нь ажлаа өг. Зөв төлөвлөлт хийж чаддаг, зөв бодлого боловсруулж чаддаг тийм дарга нартай больё. Ярихаас өөрийг хийдэггүй их тэнгэр, зайсан, нүхтийн аманд амьдардаг дарга нар өнөөгийн Улаанбаатарын нийгмийн талаар юу мэдэх юм. Тэд юу ч мэдэхгүй, мэдэхгүйнхээ хэрээр юуг ч зохицуулж чадахгүй...

Н.Чимгээ

Эх сурвалж дурдахгүйгээр зөвшөөрөлгүй хуулбарлан нийтлэхийг хориглоно.