Ким Жон Ун ерөнхийлөгч Трамп руу захидал илгээж, Пёньянд урьсан гэв
Хойд Солонгосын удирдагч Ким Жон Ун АНУ-ын Ерөнхийлөгч Дональд Трампыг Пёньянд зочлон ирэхийг урьсан талаар ойрын эх сурвалжууд нь мэдээлж байв. Гэвч Трамп энэ талаар хэвлэлийнхэнд тайлбар өгөхөөс татгалзсан бөгөөд ийм айлчлалд бэлэн биш байгаагаа илэрхийлсэн болохыг Ройтерс мэдээлсэн байна.
Сэтгүүлчид Цагаан ордонд Кимийг Хойд Солонгост урьсан эсэхийг асуухад Трамп "Бидний харилцаа маш сайн байгаа. Гэхдээ би энэ талаар тайлбар өгөхийг хүсэхгүй байна" гэж хэлжээ.
Даваа гарагт Өмнөд Солонгосын нэгэн сонин дипломат эх сурвалжаас иш татан мэдээлэхдээ Ким наймдугаар сард илгээсэн захидалдаа түүнийг Хойд Солонгосын нийслэлд айлчлахыг урьсан гэж мэдэгдсэн байна.
Мөн Ким 8-р сарын гурав дахь долоо хоногт илгээсэн захидалдаа хоёр удирдагчийн хоорондох гурав дахь дээд хэмжээний уулзалтад оролцох хүсэлтэй байгаагаа илэрхийлж, Трампыг Пёньянд зочлох урилга илгээсэн гэдгийг "JoongAng Ilbo" сонин тодорхойгүй эх сурвалжаас иш татан мэдээлэв. Улмаар 8-р сарын 9-нд Трамп Кимээс "маш сайхан захидал" хүлээж авсан болохоо хэлжээ.
Гэхдээ АНУ-ын албаны хүмүүс 8-р сард бичсэн хоёр дахь захидлын талаар тайлбар өгөөгүй л байна.
Трамп, Ким нар өнгөрсөн жилийн зургадугаар сараас хойш гурван удаа уулзаж Хойд Солонгосын пуужингийн болон цөмийн асуудлыг шийдвэрлэх арга замын талаар ярилцсан боловч ахиц дэвшил гараагүй юм.
Тэдний эхний хоёр уулзалт албан ёсны дээд хэмжээний уулзалтууд байсан бөгөөд хоёр дахь нь хоёрдугаар сард Вьетнамд болсон Умард Солонгосыг цөмийн зэвсгээс ангижруулах АНУ-ын шаардлага ба Хойд Солонгосыг хориг арга хэмжээнээс чөлөөлөх тухай шаардлагыг шийдвэрлэж чадаагүйн улмаас завсарлажээ.
Тэд 6-р сарын 30-нд хоёр Солонгосын хоорондох цэрэггүй бүсэд гурав дахь удаагаа уулзаж, хэлэлцээрийг дахин эхлүүлэхээр тохиролцсон боловч бүтээгүй юм.
Зургадугаар сард болсон уулзалтаас хойш Хойд Солонгос хэд хэдэн удаа богино зайн тусгалтай пуужинг туршсан бөгөөд НҮБ-д суугаа Хойд Солонгосын төлөөлөгчид үүнд хариу тайлбар өгөхийг хүсээгүй юм.