Гэрлэлт нь хувь хүмүүсийн сайн дурын үндсэн дээр бий болдог зүйл. Салалт ч мөн адил. Дэлхийн бүхий л улс оронд гэр бүл салалт байдаг. Гэхдээ тэдгээрийн тоо болон нөхцөл байдлыг харгалзан үзэж үүнийг нийгмийн сөрөг үзэгдэл болсон эсэхийг тодорхойлдог.

Харин манай улсын хувьд ажилгүйдэл, санхүүгийн шалтгаан, сэтгэл зүйн асуудлуудаас болж хүмүүс салж байна.

Түүнчлэн сүүлийн жилүүдэд гадаадад ажил хийх хүмүүсийн тоо эрс нэмэгдсэн нь ч үүнд нөлөөлж байгаа юм. Тэгвэл шүүхээр гэр бүлээ цуцлуулж байгаа хосуудын мэдүүлэг болон судалгаанаас авч үзэхэд жилээс жилд нэмэгдэж байгаа гэр бүл салалтад 3 том шалтгаан нөлөөлж байгаа аж.

• Нэгдүгээрт, гэр бүлийн хүчирхийлэл, архидалт, үл ойлголцлын асуудлууд
• Хоёрдугаарт, гэрлэлтээс гадуурх бэлгийн харилцаа
• Гуравдугаарт, хол тусдаа байсан гэх шалтгаан...

Гэхдээ насанд хүрсэн хүмүүсийн сонголтын үр дагаврыг хүүхэд үүрч байгаа нь хамгийн эмгэнэлтэй нь юм.

Учир нь гэр бүл салсны дараа хүүхдийн сэтгэл зүй, хүмүүжил, ёс зүйд маш их өөрчлөлт ордог. Хүүхэд хэдэн настайгаасаа үл хамаарч эцэг, эхийнхээ маргааныг янз бүрээр хүлээж авдаг. Ялангуяа бага насны хүүхэд өөрийн санаа бодлыг чөлөөтэй илэрхийлж чадахгүй ч бүгдийг зөнгөөрөө мэдэрч байдаг. Улмаар сэтгэл санаа нь хямарч, эрүүл мэндэд нь өөрчлөлт орох нь ч бий.

Харин өсвөр насны хүүхдүүд уур уцаартай болж, аливааг үзэн ядаж, өөртөө итгэлгүй болж, сэтгэл гутралд орж архи, тамхи хэрэглэх тохиолдол цөөнгүй байдаг. Мөн зарим нь өөрт тохиолдсон зүйлийг тэсэлгүй амиа хорлох сонголтыг хийдэг.

Тэгэхээр салалтын дараах эхнэр, нөхрийн харилцаа маш чухал байдаг гэдгийг бүгд ойлгох хэрэгтэй юм. Салсны дараа хосууд бие биедээ дайсагнаад харилцаа муутай, хүүхэдтэйгээ ч уулзахгүй байх нь хүүхдийн сэтгэл зүйг илүү хямрааж дарамтад оруулдаг.

Тиймээс эцэг, эхчүүд "томчууд" шиг ухаантай байж хүүхдэдээ тавих анхаарал халамжаа бууруулахгүй байх нь чухал байна.

Үүнээс гадна хойд эцэг, эхийн асуудалд маш болгоомжтой хандах нь зүйтэй. Хүчирхийлэл, гэмт хэрэг ихсэж байгаа өнөө цагт үр хүүхдээ нэгт тавьж түүний сайн танихгүй хэн нэгнийг гэртээ шууд авчрах хэрэггүй. Харин бага багаар дасгаж, хүүхдэдээ хугацаа олгох ёстой юм.

Амьдралд юу тохиолдохыг хэн ч мэдэхгүй. Магадгүй хүн яаж амьдрах ёстойгоо анхнаасаа мэддэг байсан бол бүх зүйл өөр байх байсан биз. Гэхдээ үнэхээр "бүтэхгүй" гээд салж байгаа бол үүрэг хариуцлагаа маш сайн ухамсарлах хэрэгтэй.

Салсан хэн ч бай, үр хүүхдийнхээ хувьд сайн эцэг, эх байх үүрэгтэй билээ. 

Э.Анударь

Эх сурвалж дурдахгүйгээр зөвшөөрөлгүй хуулбарлан нийтлэхийг хориглоно.