Хойд хөршийн Ерөнхий Сайд Дмитрий Медведевийн саналаар ОХУ-ын Хөдөлмөрийн Яам бүх Орос даяар хэд хэдэн үйлдвэр аж ахуйн газрыг долоо хоногт ажлын 4 өдөртэй болгохоор болжээ. Ажлын 4 өдөртэй болох талаар улстөрчид, ажил олгогчид ямар саналтай байгааг сонирхов.

Энэ оны 6-р сард Дмитрий Медведев Швейцарийн Женев хотноо Олон Улсын Хөдөлмөрийн Байгууллагын 108-р хуралдаанд оролцохдоо Орос улсад хүмүүс долоо хоногт 5 биш 4 өдөр ажиллаж эхлэх хугацаа тун ойрхон байна гэж мэдэгдсэн. Ерөнхий сайдын үзэж байгаагаар ийнхүү өөрчлөгдсөнөөр хүмүүс илүү аз жаргалтай болж хөдөлмөрийн бүтээмж нэмэгдэх ажээ. 9-р сарын 11- нд Медведев ажлын 4 өдөрт шилжих хугацааг илүү тодорхой нэрлэсэн байна. Тэрбээр “Зарим ажил мэргэжлийн хувьд үнэндээ маргаашнаас ч шилжих боломжтой бол цөөнгүй ажил мэргэжлийн хувьд нэлээд алсын хэтийн асуудал” гэж хэлсэн байна. Мөн тэрбээр иргэдэд ажлын өдөр багассанаар цалин буурахгүй болохыг батлан хэлжээ.            

Дмитрий Медведев 8-р сарын сүүлээр Хөдөлмөрийн Яаманд ажлын 4 өдөртэй долоо хоногт шилжих саналыг судлан 9-р сарын 30-ны дотор үнэлгээ дүгнэлт гаргах үүрэг даалгаврыг өгсөн байна. Өнөөдөр “Известия” сонинд мэдээлснээр хэд хэдэн үйлдвэр, аж ахуйн газруудад ажлын 4 өдөртэй долоо хоногийг нэвтрүүлэх туршилтын тухай авч хэлэлцэх уулзалтууд Хөдөлмөрийн Яаманд энэ долоо хоногт болох ажээ.

Туршилтаар хэрэв ажлын цагийг багасгаснаар хөдөлмөрийн бүтээмж нэмэгдэж буй батлагдаж байвал Медведевийн санаачлагыг бүх орон даяар нэвтрүүлэх тухай ярьж эхэлж болох юм байна. Энэ талаар Эдийн засгийн хөгжлийн сайдын орлогч Пётр Засельский “Известия” сонинд “Үйлдвэр, аж ахуйн газруудад ажилтнууд нийт ажлын цагийнхаа 30-40%-д нь юу ч хийдэггүй. Манай зорилго бол ажлын өдрийг тоог цөөлөх биш харин өдрийг илүү үр ашигтай болгох юм. Туршилтыг “Хөдөлмөрийн Бүтээмжийг дээшлүүлэх Үндэсний Төсөл”-д оролцогч үйлдвэр, аж ахуйн газруудад явуулна” гэж хэлсэн байна.

“Ажил хэрэгч Орос” хэмээх олон нийтийн байгууллагын дэд ерөнхийлөгч Николай Остарков ажлын 4 өдөртэй долоо хоногийг түүний бодлоор хөдөлмөрийн үр ашиг хамгийн доогуур байдаг төрийн байгууллагуудад туршиж эхлэхийг санал болгожээ.    

Төрийн Дум дах “Нэгдсэн Орос” намын бүлгийн даргын нэгдүгээр орлогч Андрей Исаев Засгийн газрын тэргүүн Медведевийн саналыг дэмжсэн байна. Тэрбээр хэлэхдээ: "Долоо хоног тутамд амралтын 3 өдөр байна гэдэг хүмүүсийн амьдралд хүсэн хүлээж буй чанарын өөрчлөлтийг авчирна. Энэ бол хүний хувьд маш том эрх чөлөө, өөрийгөө илэрхийлэх илүү том боломж бөгөөд эндээс илүү үр бүтээлтэй хөдөлмөр бий болно гэсэн үг" гэсэн байна. (эх сурвалж: Российская газета)

Мөн тэрбээр хуулиар ажлын цагийг зайлшгүй багасгах нь ажилгүйдлийн өсөлтийг зогсоох боломж олгоно гэж нэмж хэлсэн аж.

Гэхдээ уг шийдлийг шүүмжлэх хүмүүс бас олон байна. Оросын Коммунист намаас Төрийн Думд сонгогдсон депутат Николай Арефьев DailyStorm-д өгсөн ярилцлагадаа “Засгийн газар ажилгүйдлийн өсөлтийг ажлын 4 өдөртэй долоо хоногоор халхлахаар оролдож байна. Энэ бол үнэндээ эдийн засаг агшиж байгаа баримт юм. Эдийн засгийн идэвхитэй ажилтнуудын талаас илүү хувь нь богиносгосон ажлын долоо хоног, богиносгосон ажлын өдөр ажиллаж байна. Өнөөдөр хүмүүс ингэж ажиллаж байхад ядаж цалин нь хэвээрээ хадгалагдаж байна. Хэрэв бид албан ёсоор ажлын 4 өдөртэй болбол 5 дах өдөрт нь цалин төлөх юм уу? Лав ойрын хугацаанд төлөхгүй. 100 гаруй жилийн өмнө Карл Маркс нэмүү өртгийн хуулийг нээсэн. Ажил олгогч нар амралтын өдөрт цалин төлдөг тийм зүйл байхгүй. Тэгэхээр ажилчдын цалин шууд 20%-иар буурна гэсэн үг. Тэгвэл бид ядуурлыг 2 дахин бууруулах ерөнхийлөгчийн зарлигийг яаж биелүүлэх болж байна? Хүн амын амьжиргааны түвшин сүүлийн 6 жил дараалан буурч байна шүү дээ” гэж хэлжээ.

Түүнчлэн “Шударга Орос” намаас Төрийн Думд сонгогдсон депутат Олег Шейн DailyStorm-д өгсөн ярилцлагадаа Засгийн Газар яагаад гэнэт ажлын 4 өдөртэй долоо хоногийн тухай ярих болсон шалтгааныг нэрлэсэн байна. Түүний батлан хэлснээр ажлын байр жил ирэх тутамд багасаж байгаа ч үйлдвэрлэгдсэн бүтээгдэхүүний хэмжээ өмнөх төвшиндөө хэвээрээ байна. Энэ нь ажилгүйдэл өсч байгааг харуулж байгаа бөгөөд маш их хэмжээний хүмүүст хийх ажил огт байхгүй байгаа ажээ. Түүний бодлоор энэ байдлыг тэтгэврийн хуучин насыг эргэн сэргээх эсвэл ажлын долоо хоногийг багасгах замаар засах боломжтой гэлээ. Хэдий тийм боловч тэрбээр Медведевийн саналыг “түүний явуулж буй улс төрийн бодлоготой ямар уялдаа холбоо байхгүй уран зөгнөл” гэж нэрлэсэн байна. Мөн тэрбээр засгийн газрын явуулж буй бодлогыг “тэд иргэдийн хөдөлмөрлөх эрхийг зөрчин хүмүүсийг ахиад ялихгүй мөнгөний төлөө илүү цагаар шаргуу ажиллахад хүргэхээр санаархаж байна” гэж хурцаар шүүмжлэв.                       

HeadHunter – аас “Известия” сонинтой хамтраад ажил олгогчид энэ асуудалд хэрхэн хандаж буйг тодруулжээ. Судалгаанд хамрагдсан 200 ажил олгогчоос 76% нь ажлын 4 өдөрт шилжихийг огт авч хэлэлцээгүй бол 8% нь нэлээн алс ирээдүйд шилжих боломжтой, 12% нь ойрын 2 жилийн дотор нэмж ажлын 1 өдрийг амралтын өдөр болгоход бэлэн гэдгээ илэрхийлжээ.

Ажил олгогчдын бодлоор ажлын долоо хоногийг богиносгох нь зайлшгүй цалингийн хэмжээ буурах, цагийн ажилтнуудын тоог нэмэгдүүлэх мөн ажилтнуудад ирэх дарамт шахалт нэмэгдэхэд хүргэх ажээ.