Хятадын олон мянган сэтгүүлчид эрх баригч Коммунист намын улс төрийн үзэл баримтлалын талаарх мэдлэг болон удирдагч Ши Жиньпинд хэр үнэнч байдгаа удахгүй шалгуулах гэж байна . Хэрэв тэд хоёр оролдлогын дараа тестийг давж чадахгүй бол цаашид хэвлэл мэдээллийн салбарт ажиллахад нь саад учирч болзошгүй аж.
Хятад Медиа Төсөл болон "South China Morning Post"-ийн мэдээлж байгаагаар Хятадын төрийн хэвлэл мэдээллийн хэрэгсэлд ажилладаг сэтгүүлчдээс уг тестийг авах гэнэ. Тестийг энэ оны эхээр засгийн газраас танилцуулсан "Ши, Хүчтэй үндэстэн" гэх нэртэй аппликейшн дээр тулгуурлан боловсруулах юм.
"South China Morning Post"-ийн бичсэнээр Мао Зэдуны "Бяцхан улаан ном" -той адилтгасан тус аппликейшн нь Ши Жиньпиний улс төрийн гүн ухааны талаарх нийтлэл, видео клип болон бусад мэдээллүүдийг багтаасан гэнэ.
Хятадын засгийн газраас ашиглахыг зөвлөсөн энэхүү аппликейшн нь хэрэглэгчдэд оноо өгч, тэдний үйл явцыг хянаж байдаг.
Түүнчлэн сэтгүүлчдэд зориулсан шалгалт тийм ч хэцүү биш байх төлөвтэй байгаа боловч тестэд Ши Жиньпиний “Шинэ эрин дэх социализмын сургаал” болон “суртал ухуулгын талаарх чухал баримтлалууд” гэх мэт асуултууд орно гэж "The Guardian" мэдээлэв.
Харин 10,000 орчим сэтгүлч, редакторууд 10-р сарын эхээр улс даяар туршилт явуулахаас өмнө сургалтад суух төлөвтэй байгааг "Morning Post" мэдээлжээ.
2019 оны дэлхийн хэвлэлийн эрх чөлөөний индексээр Хятад нь 180 орноос 177-д эрэмбэлэгдэж, зөвхөн Эритрей, Хойд Солонгос, Туркменистаны өмнө бичигдсэн байна.
