Эко амьдрал энгийнээс эхэлдэг...
Хүн төрөлхтний хөгжил, технологийн дэвшил өсөн нэмэгдэхийн хэрээр хог хаягдлын асуудал дэлхий нийтийн санааг чилээх болсон. Тиймээс бид өнөө маргаашийн амьдралаа аргацаахаа больж, уг асуудалтай тэмцэх шаардлагатай байна.
Сүүлийн жилүүдэд дэлхий дахинаа хүмүүс эрүүл амьдрах хэв маягийг чухалчилж эко амьдрахыг хичээх болсон. Түүнчлэн бүгд л дэлхийн экологийн тэнцвэрт байдал алдагдаж байгаль орчны бохирдол ихсэж, нөөцийн хязгаарлагдмал байдал бий болж хүмүүсийн амьдралд сөрөг нөлөө үзүүлэх болсныг бага багаар анзаарч эхэлж байна.
Угтаа бол эко амьдарна гэдэгт эдэлж хэрэглэж байгаа бүхэн тань байгальд ямар нэг сөрөг нөлөө үзүүлэхгүй байхыг хэлж байгаа юм. Энэ нь нэг талаасаа тухайн хүнд өөрт нь ч тустай, нөгөө талаасаа хүрээлэн буй орчинд ч ээлтэй.
Энгийнээр, таны иддэг хоол хүнс, хэрэглэж буй хувцас хэрэглэл, машин техник гэх мэт бүхий л зүйлс байгальд хоргүй технологиор үйлдвэрлэгдсэн байх ёстой ажээ.
Хог хаягдлын байгаль орчинд үзүүлэх нөлөөг дурдана гэвэл дуусахгүй. Үүнд нүдэнд их харагдахаас эхлээд далдуур бидний эрүүл мэндэд хохирол учруулж байдаг олон зүйлс бий.
Ялангуяа манай улс шиг хог дахин боловсруулах үйл явцад анхаарал хандуулдаггүй газруудад энэ нь аюулын харанга дэлдэж байна. Дэлхийн өндөр хөгжилтэй орнууд шиг хогоо ялгаж хаядаг систем манайд алга. Дээр нь иргэдийн гудамжиндаа ил задгай хогоо хаядаг хэвшил арилахгүй байсаар л байна.
Тэгэхээр бид одооноос өөрсдийнхөө амьдралын хэв маягт анхаарах хэрэгтэй болж байна. Адаглаад хогоо ил задгай хаяхаа болимоор байна. Гялгар уутны хэрэглээнээс аль болох татгалзаж даавуун уут хэрэглэж хэвших нь зөв юм.
Мөн айл бүр чадах чинээгээрээ хогоо ялгаж хаяж хэвших нь хог хаягдлын асуудлыг шийдэхэд бага ч гэсэн хувь нэмрийг оруулах болно.
Ирээдүйд бидний үр хүүхэд дэлхийн нийтийн хөгжлийг даган хөл нийлүүлэн алхах учир томчууд бага насны хүүхдүүддээ амьдралын зөв хэвшлийг үлгэрлэх нь чухал юм.
Хэдийгээр аливаа асуудал нэг өдрийн дотор шийдэгдэхгүй боловч бид бага багаар өөрсдөөсөө эхэлж өөрчлөлтийг хийснээр хүссэн үр дүндээ хүрч чадах юм.
Хогоо хаяхгүй байх энгийн нэг үйлдэл таны эко амьдралын эхлэл юм шүү.
Э. Анударь
Эх сурвалж дурдахгүйгээр зөвшөөрөлгүй хуулбарлан нийтлэхийг хориглоно.