2018 оны 12-р сараас хойш Оросын 122 хүүхдийг Иракаас нүүлгэн шилжүүлжээ
2018 оны 12-р сараас хойш Оросын 122 хүүхдийг Иракаас эх орон руу нь буцаан авчирсан гэж Оросын Онцгой байдлын яамны хэвлэлийн төлөөлөгч мэдэгдсэнийг ТАСС мэдээллээ.
Тус яамны хэвлэлийн төлөөлөгч "Бүх яамны онгоцнууд Ирак руу дөрвөн нислэг үйлдэж, 122 хүүхдийг Оросод авчирсан" гэж хэлээд "Энэ тоонд даваа гарагийн орой Москвад ирсэн 32 хүүхэд ч багтсан" болохыг нэмж дурдсан байна.
4 цагийн нислэгийн дараа нэгээс ес хүртэлх насны тэдгээр хүүхдүүдийн сэтгэл санаа нь хэвийн байгаа аж. Түүнчлэн цаашдаа ч байлдааны ажиллагаа явуулж буй тус бүс нутгаас Орос хүүхдүүдийг эрэн хайж олох, нүүлгэн шилжүүлэх ажлыг тасралтгүй үргэлжлүүлэх гэнэ.
Оросын Иракт суугаа элчин сайд Максим Максимов "Иракаас Оросын хүүхдүүдийг нүүлгэн шилжүүлэх ажил бараг дуусаж байсан. Мөн Багдадын хорих ангид ээжтэйгээ хамт байсан Орос хүүхдүүдийн сүүлчийн хэсгийг Иракийн эсэргүүцэл, үймээн самууны үеэр ОХУ руу буцаан авчирсан" гэж хэлжээ.
Тэрбээр "Хэдийгээр ширүүн биш ч гэсэн эсэргүүцлүүд үргэлжилсээр байна. Нийслэл хотын төв болон зэргэлдээ гудамжнуудыг хааж байна" гэж нэмж өгүүлэв. Гэсэн хэдий ч Иракийн эрх баригчид Оросын элчин сайдын яаманд тодорхой өдөр товлож хүүхдүүдийг Оросын төлөөлөгчдөд хүлээлгэн өгөхөд бэлэн байгаа тухай мэдэгджээ.
2 талын удирдлагууд эсэргүүцэл хурцадсан тохиолдолд насанд хүрээгүй хүүхдүүдийг нүүлгэн шилжүүлэх ажлыг хойшлуулахвий гэхээс айж байжээ.
Энэхүү хүмүүнлэгийн ажиллагаанд оролцсон бүх хүмүүсээс маш их зориг, өндөр хариуцлага шаардагдсан юм. ОХУ-ын хүүхдүүдийг байлдааны ажиллагааны бүсээс нүүлгэн шилжүүлэхэд туслах зорилгоор 2017 онд Оросын хүүхдийн эрхийг хамгаалах газрын дэргэд тусгай комисс байгуулагдаж байсан юм. Улмаар засгийн газрын төлөвлөгөөний дагуу 9 хүүхдийг 2018 оны 12, 2, 6-р сард эх оронд нь буцаав. Харин 32 хүүхдийг өмнө нь Багдад хотоос Москвад авчирч байжээ.