Монголын улс төрчид, дарга нар болон толгой баячууд Өмнөд Солонгос улсын "Seven Luck" казинод сүүлийн 5 жилийн хугацаанд 1 тэрбум орчин ам.долларыг "тушаажээ." Энэ бол одоо ч өрийг нь дарж чадаагүй байгаа Чингис бондтой дүйцэхүйц их хэмжээний мөнгөн дүн юм.

Тэгвэл өнгөрсөн жилүүдэд хэн гэгч эрх мэдэлтнүүд мөрийтэй тоглоомд нэр холбогдож байсныг эргэн саная.

Одоогийн Ерөнхий сайд У. Хүрэлсүх, УИХ-ын дарга Г. Занданшатар, Төрийн сайд асан Т. Бадамжунай, Эрүүл мэндийн сайд асан Н. Хүрэлбаатар нар Хадгаламж банкны 14 тэрбум төгрөгийн асуудалд нэр холбогдож, Макао болон Солонгос улсад казино тоглосон  гэгдэж байв.

Мөн Алтай констракшн компанийн захирал Х. Бат-Эрдэнэ, Гадаад харилцааны дэд сайд Б. Батцэцэг, Нийслэлийн хөрөнгө оруулалтын газрын дэд дарга асан А. Хаянхярваа, Дамбын Хишгээ, Дархан аварга Г. Өсөхбаяр, Симба Батаагийн дүү Ц.Бат-Энх зэрэг нэр нөлөөтэй хүмүүс ч казиногийн хэрэгт холбогдож байсан юм.

Харин дараа нь Монголын уламжлалын нэгдсэн намын дарга Б. Батболд, УИХ-ын гишүүн асан Д. Зоригт, УИХ-ын гишүүн асан Д. Загджав, Уул уурхайн яамны хэлтсийн дарга асан н.Цогтбаатар, Макс группын захирал Д. Ганбаатар нар Вояж гэх зочид буудалд мөрийтэй тоглож байгаад баригдсан гэдгийг хэвлэл мэдээллийн хэрэгслүүдээр мэдээлж, шуугиан тарьж байсан юм.

Энэ хэргээс төд удалгүй УИХ-ын гишүүн асан Ц. Дашдорж, Сангийн яамны газрын дарга Х. Пүрэвсүрэн нар Өмнөд Солонгос улсад 250.000 сая төгрөгөөр казинодсон нь илчлэгдэж байсан билээ.

Түүнчлэн казиногийн буухиаг Ерөнхий сайд асан С. Баяр үргэлжлүүлж, Сингапур улсын казинод автомат машинаар тоглосон байна. Харин УИХ-ын гишүүн Н. Номтойбаяр, УИХ-ын гишүүн асан Бадамсүрэнгийн хүү Бадрах, Мунзуй хочит Г. Нямдорж нар Монгол улсад покер тоглож байгаад баригдсан юм.

Ингээд ч зогсохгүй экс Ерөнхийлөгч Ц. Элбэгдорж, ТЕГ-ын дарга асан Б. Хурц, ЗГХЭГ-ын дарга асан Ж. Мөнхбат, УИХ-ын гишүүн С. Жавхлан, Монгол банкны ерөнхийлөгч асан О. Чулуунбат зэрэг нэр нөлөө бүхий хүмүүс казинодож яваад камерын дуранд үлдсэн байдаг.

Хамгийн сүүлд ГЕГ-ын дэд дарга Ё. Бат-Эрдэнэ, МИАТ компанийн ажилтан Н. Баатарцогт нар мөртйтэй тоглож байгаад албан тушаалаасаа чөлөөлөгдлөө.

Эдгээр баримтууд бол олон нийтэд ил гарсан мэдээллүүд юм. Үүний цаана хэдэн эрх ямба эдэлсэн, халдашгүй дархан эрхтэй гэгддэг дарга нар ямар хэмжээний мөнгөөр мөрийтэй тоглож, туйлж явааг хэн ч таашгүй юм. 

Үүнтэй холбоотойгоор 2019 оны Засгийн газрын 33 дугаар тогтоолоор батлагдсан Төрийн бүх шатны албан тушаалтнуудын ёс зүйн дүрэмд нэмэлт, өөрчлөлт оруулж 3.1.4-т дотоод, гадаадад мөрийтэй тоглох /казино тоглохгүй байх/ энэ төрлийн үйлчилгээний газраар үйлчлүүлэхгүй байх журмыг баталсан. 

Гэвч хариуцлагын асуудлыг хэн ч сөхөхгүй байна. Иргэдийнхээ татварын мөнгөөр зугаацаж, казинодсон эрх мэдэлтнүүд өнөө хэр нь албан тушаал дээрээ байсаар л байна. Зарим нь бүр тушаал дэвшиж, улсын эх орны хэтийн бодлогыг хэлэлцээд сууж байна. 

Өртэй Монголын түрийвч зузаан эрх мэдэлтэн, дарга нарын казинод алдсан мөнгийг одоо ер нь хариуцах вэ? Ганц л хариулт байна. Тэр бол "Монгол иргэд". 

Э.Анударь

Эх сурвалж дурдахгүйгээр зөвшөөрөлгүй хуулбарлан нийтлэхийг хориглоно.