Монгол Улс нь Парламентын засаглалтай орон. Улсын Их Хурал (Парламент)-ын сонгуулийг 4 жил тутамд нэг удаа явуулж 76 гишүүн сонгогддог. Мөн орон нутгийн сонгуулийг 4 жил тутам явуулж, аймаг, нийслэл, сум, дүүргийн иргэдийн хурлыг байгуулдаг.

Тэгвэл УИХ-ын 2016 оны сонгуулийн санал хураалтад 1932.3 мянган хүн сонгуульд оролцох нэрсийн жагсаалтад бүртгэгджээ. Үүний 73.7 хувь нь буюу 1424.5 мянган хүн сонгуулийн санал хураалтад оролцсон байна.

2016 оны сонгуульд ойролцоогоор 192 мянган залуучууд 18-21 насны бүлэгт дэвшиж сонгууль өгөх эрхтэй болсон бөгөөд 18-25 насны залуучууд түүний 46.7 хувийг эзэлж байжээ. Гэхдээ 18-25 насны залуучуудын сонгуулийн идэвх хамгийн муу байсан юм. Энэ насны бүлгийн 2 хүн тутмын нэг буюу ойролцоогоор 50 хувь нь сонгуульд оролцоогүй. Энэ нь шинээр сонгууль өгөх эрхтэй болсон залуучуудынхаас хамаагүй өндөр үзүүлэлт юм.

Харин насны бүлэг ахих тусам сонгуулийн идэвх нэмэгдэж байсан бөгөөд 60-аас дээш насныхны хувьд 100 хүн тутмын 97 нь санал хураалтад оролцжээ. Хүйсийн хувьд эмэгтэйчүүдийн 76.6 хувь, эрчүүдийн 70.6 хувь сонгуульд саналаа өгсөн байна.

Энэ нь эмэгтэйчүүд илүү хариуцлагатай, илүү идэвхитэй байгааг илтгэж байна.

Тэгвэл орон нутгийн хувьд аваад үзвэл мөн адил сонгогчдын нас ахих тусам сонгуулийн идэвх нэмэгдэж байжээ. Санал хураалтад 26-40 насны хүмүүсийн 35.9 хувь, 41-55 насны хүмүүсийн 49.0 хувь нь сонгуулийн санал хураалтад оролцсон байна.

Сонгуулийн идэвх хамгийн өндөр 56, түүнээс дээш насны сонгогчдын идэвх 66 хувь байгаа нь улсын дунджаас 31 пунктээр бага байгаа юм. 

Эцсийн үр дүн нь ийм байхад цахим орчинд 18-25 насны залуус улс төрчдийг ихээр шүүмжилж, эх орны хөгжлийн талаар мэтгэлцэх болж... Угтаа бол сонгуулиа өгөөгүй хүнд төр засгаас элдвийн зүйлсийг шаардах эрх үүсэхгүй. 2016 оны сонгуулийн төсөв 25.4 тэрбум төгрөг байсан. Гэтэл сонгуульд оролцоогүй өнөө мундаг залуу үеийнхэн тэр мөнгийг зүгээр л салхинд "хийсгэчихсэн" гэхэд хилсдэхгүй. 

Тийм хэрнээ, нийгмийг шүүмжилж ихэд бухимдацгааж, амаа ажиллуулахаас өөр юм хийхгүй юм. Сонгууль өгөхгүй бол таны санал худалдагдана. Үзэл бодол, хүсээд байгаа хөгжил дэвшил, эдлэх боломжууд чинь үгүй болно.

Иймийн учир залхуу зан, хойрго байдлаа ирэх жил л битгий гаргаарай залуусаа. Та нарын, үр хүүхдүүдийн чинь ирээдүй өөрсдөөс чинь эхлэлтэй. Сонголтоо зөв хийж, саналаа бүү худалд.

Одоо өвөө эмээгийнхээ сонгуулийн саналаар төр засгаа удирдуулдаг цаг үе дууссан шүү. Шинэ үеийн залуусыг ирэх жил ухаан зарна гэдэгт найдья.

Н.Чимгээ

Эх сурвалж дурдахгүйгээр хуулбарлан нийтлэхийг хориглоно.