Өнгөрсөн оны 12-р Хятадын Ухань хотод дэгдэж эхэлсэн Коронавирусээр өдгөө 2118 хүн өвчилж 80 хүн амиа алдаад байна. Тус вуирус нь өдгөө зөвхөн Хятадад ч биш Солонгос, АНУ, Япон зэрэг нийт 16 оронд тархаад байгаа аж.
Халдварын тохиолдол цаг минут бүрт нэмэгдэж байгаа учраас та бүхэнд Өнгөрсөн 24 цагийн хугацаанд чухам юу болж өнгөрснийг тоймлон хүргэе.
1 Шинж тэмдэг нь илрээгүй байхдаа бусдад халдвар тараадаг
Хятадын эрүүл мэндийн сайд Мао Шиаовэй сэтгүүлчдэд амиа алдсан хүмүүсийн тоо 56-д хүрсэнийг мэдэгдээд коронавирус нь үл мэдэгдэх хэлбэрээр тархаж эхэлсэн болохыг хэлсэн байна.
Өмнө нь халдвар авсан хүмүүст ханиалгах, халуурах гэх мэт шинж тэмдэгүүд илэрдэг байсан юм. Харин одоо шинээр халдвар авсан хүмүүст 7-10 хоногийн дотор ямар нэг зовуурь илрэхгүй байгаа гэнэ.
Хамгийн аюултай нь коронавуристай хүн шинж тэмдэг илрээгүй байхдаа ч бусдад халдвар тарааж чадах аж.
Тийм учраас Хятадын засгийн газар ард иргэдээ олон хүн цугларсан газраар явахгүй байхыг анхааруулсан юм.
2 15 эмнэлгийн ажилтан халдвар авчээ
Ухань хотын төв эмнэлгийн нэгэн сувилагч "CNN" агентлагт дор хаяж 15 эмнэлгийн ажилтан коронавирусын халдвар авсан гэж мэдэгджээ.
“Зарим хүмүүс сэхээн амьдруулах тасагт эмчилгээ хийлгэж байна. Бага зэргийн шинж тэмдэг илэрсэн хүмүүсийг гэр лүү нь буцаасан” гэж нэрээ нууцалсан сувилагч хэлсэн байна.
Гэртээ харьсан хүмүүс гадаад ертөнцөөс бүрэн өөрсдийгөө тусгаарласан бөгөөд тэднийг асрах сувилагч нарыг илгээсэн ажээ.
Одоогийн байдлаар Ухань хотод нийт 1600 эмнэлгийн ажилтан 1046 коронавирустай өвчтөнүүдийг асарч байгаа гэнэ.
3 Коронавирус хөрөнгийн зах зээлд нөлөөлж эхлэв
АНУ-д 5 дахь тохиолдол илэрсний дараа Нью-Йорк болоод Японы хөрөнгийн зах зээлд савалгаа үүсч эхлэв.
Нью-Йоркийн “Dow Jones” аж үйлдвэрийн хувьцаануудын дундаж индекс 300 нэгжээр унасан нь сүүлийн 18 сард байгаагүй муу үзүүлэлт юм. "S&P 500" болон "Nasdaq" хөрөнгийн биржийн холимог хувьцааны индекс 3.82 хувь болж буурсан нь өнгөрсөн оны 10-р сараас хойших хамгийн муу үзүүлэлт болжээ.
Мөн Цагаан сарын баяраар ажилладаг Азийн цорын ганц томоохон хөрөнгийн бирж "Nikkei" 500 нэгжээр унасан нь олон улсын хөрөнгийн зах зээлд аюулын харанга дэлдэж эхлэв.
4 Хэдэн оронд халдвар илэрсэн бэ?
Саяхан Балба улсад нэг хүн халдвар авсан нь илэрсэн байна. Ингэснээр нийт 16 оронд коронавирусын халдвар албан ёсоор бүртгэгдээд байгаа юм.
Халдвар бүртгэгдсэн орнуудын жагсаалт:
- Хятад: 2,062
- Хонконг: 8
- Тайланд: 8
- Макао: 5
- АНУ: 5
- Австрали: 4
- Япон: 4
- Малайз: 4
- Сингапур: 4
- Тайван: 4
- Франц: 3
- Өмнөд Солонгос: 3
- Вьетнам: 2
- Канад: 1
- Балба: 1
5 Коронвирусын эмчилгээг туршиж эхлэв
Бээжин хотын эрүүл мэндийн комисс "Lopinavir", "Ritonavir" зэрэг ДОХ/ХДХВ-ийн эмчилгээний бэлдмэлийг коронавирусын эсрэг хэрэглэж эхэлсэн билээ.
Тэгвэл АНУ-ын Чикаго хотын эмнэлэгт "Infante" хэмээх вирусийн эсрэг үйлчилгээтэй бэлдмэлийг мөн адил туршиж эхэлсэн байна. Судлаачид тус бэлдмэл нь коронавиурсыг бүрэн эмчилж чадахгүй ч халдварын эсийг саармагжуулахад тусална гэж үзэж байгаа юм.
6 Цагаан сарын баярыг хориглов
Хятадын цагаан сарын амралт энэ долоо хоногт дуусах ёстой байсан. Харин эрх баригчид 2-р сарын 2 хүртэл сунгах шийдвэр гаргасан аж. Үүний дагуу бүх сургууль цэцэрлэг, их сургуулиуд амрахаар болжээ.
Мөн цагаан сарын баяраар олныг хамарсан арга хэмжээ, баярын ёслол зэргийг зохион байгуулахгүй байхыг цагдаагийн газраас анхааруулсан гэнэ. Хятадын цагаан сарын баяраар нэгнийдээ зочлохдоо хэт олноор цуглахгүй байхыг Эрүүлийг хамгаалах хорооноос анхааруулав.
7 Хятадын Ухань хотод байгаа Монгол оюутнуудыг эх оронд нь авчирна
Халдварын голомт болсон Ухань хотод Монгол Улсын 31 оюутан байгаа юм. Тиймээс эдгээр иргэдийн асуудлыг Засгийн газрын хуралдаанаар хэлэлцэж, тодорхой шийдвэр гаргасан байна. Тэд Ухан хотод суралцдаг монгол оюутнуудыг эх оронд нь авчрах асуудлыг хэлэлцээд, Хятадын Засгийн газарт саналаа тавьж, энэ долоо хоногт багтаан тусгай онгоц явуулж, Монгол Улсын иргэдийг авчрахаар болсон гэдгийг Шадар сайд Ө.Энхтүвшин мэдээллээ.
Одоогоор Уханьд байгаа монгол оюутнуудын биеийн байдал сайн, халдвар аваагүй гэдгийг мэдэгдэж байгаа аж.
8 Зэрлэг амьтдын худалдааг хоригложээ
Коронавирусний тархалтыг зогсоох зорилгоор зэрлэг амьтдын худалдааг орон даяар хориглох шийдвэрийг Хятадын эрх баригчид гаргажээ.
Уг шийдвэрийн дагуу зах, супермаркет, зоогийн газар, онлайн худалдааны сайтууд зэргээр бүх төрөл зүйлийн зэрлэг амьтны худалдааг хориглож байгаа юм байна. Дээрээс нь амьтдыг тэжээдэг газруудад хөл хорио тогтоосон гэнэ.
КОРОНАВИРУСЫН ДЭЛХИЙ ДАЯАРХ ТАРХАЛТЫГ ХАРУУЛАХ ИНТЕРАКТИВ ГАЗРЫН ЗУРАГ
