“Башар Асад нь ОХУ, Туркийн ерөнхийлөгчдийн хооронд болсон хэлэлцээний үр дүнг өндрөөр үнэлсэн ба Сири улсын бүрэн байдлын төлөө террористуудтай хийж байгаа тэмцэлд ОХУ ихээхэн тус нэмэр болж байгаад талархаж байгаагаа илэрхийллээ” хэмээн Кремлийн хэвлэлийн албанаас мэдээлжээ.

Путин Эрдоган нарын Москвад хийсэн хэлэлцээ нь 6 цаг үргэлжилж Сирийн хямралт байдлыг арилгах зорилготой хамтын баримт бичигт гарын үсэг зурснаар дууссан билээ.

Энэ уулзалтын гол үр дүн нь Идлибийн орчимд цэрэг дайны ажиллагааг зогсоох тохиролцоонд хүрсэн явдал юм.  Ингэснээр М-4 авто замын дагуух бүсэд Орос Туркийн хамтарсан эргүүл 3-р сарын 15 –наас ажиллаж эхлэх болно.

Хэлэлцээний дараа Туркийн ерөнхийлөгч сэтгүүлчидтэй уулзах үеэрээ Туркийн эсрэг хийх Сирийн армийн ямарваа нэг үйл ажиллагаанд хариу үзүүлэх эрх нь бидэнд бий гэж мэдэгдсэн ба энэ талаар ОХУ-тай нягт хамтран ажиллах болно гэж нэмэн хэлсэн байдаг. Идлиб орчмын байдлыг намжаахын тулд нэмэлт хүч татан авчирч, хяналтыг цэгүүдийг нэмж байрлуулах бодолтой байгаа тухайгаа мөн хэлсэн байна.

Хэлэлцээний үр дүнд ЕХ ч бас сэтгэл өндөр байгаа бөгөөд олон тооны цагаач дүрвэгсдийг амьдран байсан нутагт оронд нь буцан очих боломжийг хоёр тал хангахыг хичээн ажиллах юм. Мөн ОХУ болон Турк нь Сирийн тусгаар тогтнол, улс орны  бүрэн бүтэн байдлыг хүндэтгэж байгаа, мөргөлдөөн болж буй бүс нутгийн асуудлыг зөвхөн энхийн замаар шийдэх хэрэгтэй гэж үзэж байгаагаа хамтарсан баримтад тодорхойлсон байна.

Хэлэлцээний дараа НҮБ-ийн ерөнхий нарийн бичгийн дарга Антониу Гутерриш нь хоёр талын тохиролцоогоор Идлибийн орчинд ойрын үед гал зогсох болно гэж найдаж байгаагаа мэдэгдлээ.

Сирийн ерөнхийлөгч Башар Асад нь Оросын Россия 24 сувагт өгсөн ярилцлагадаа "хэрвээ АНУ болон Туркийн цэргүүд Сирийн газар нутгийг орхихгүй бол хүч хэрэглэхэд бэлэн байгаа" гэдгээ мэдэгдээд, Курдууд нь Вашингтонтой хамтран ажиллахаа зогсоосны дараа л тэдэнтэй яриа хэлэлцээ хийх болно гэжээ. Бас Турк улстай харилцаа нь сайжирч болох магадлал бийг тэмдэглээд энэ нь зөвхөн Туркийн ерөнхийлөгч террористуудыг дэмжихээ больсон нөхцөлд хэрэгжих болно гэжээ.

Одоогийн байдлаар Идлиб нь босогчдын мэдэлд байгаа Сирийн цорын ганц бүс бөгөөд 2017 оноос энд зэвсгээ хураалгахаас татгалзсан босогчид цуглаж эхэлсэн байна.  Энэ оны 2-р сараас тухайн бүст байдал огцом хурцдаж,  босогчид өргөн хэмжээний давшилт эхлүүлсэн гэж ОХУ-ын Батлан Хамгаалах яам мэдэгдсэн байдаг. 27 ны өдөр Сирийн засгийн газрын армийн цохилтын улмаас Туркийн 33 цэрэг амиа алдсан нь байдлыг бүр ч хүндрүүлсэн юм.

ОХУ-ын Батлан Хамгаалах яам нь тухайн явдлыг тайлбарлахдаа: Сирийн арми нь Идлибийн Бехун хотод, террористуудын бөөгнөрсөн хэсэгт цохилт өгсөн бөгөөд энэ бүст Туркийн цэрэг огт байх ёсгүй ч байсан учраас ийм явдал боллоо. Оросын тал нь хурцадмал байдлыг намжаахын тулд Сирийн армийн цохилтыг зогсоох бүх л арга хэмжээг авч байгаа болно гэж мэдэгдсэн байна.

Мөн Сирийн нутагт шархадсан, амиа алдсан цэргүүдийг тус бүсээс гаргах ажлыг Москва зохион байгуулсны дараа буюу 27 нд Анкара нь Сирийн армийн эсрэг “Хаврын бамбай” хэмээх ажиллагаагаа эхлүүлсэн нь уг хямралыг улам бүр өргөжүүлсэн билээ.

Туркийн дэд ерөнхийлөгч Фуат Октай нь амь алдсан цэргүүдийнхээ өшөөг Башар Асадаас авна, тэр асар их үнэ төлөх болно гэж амлаж байсан төдийгүй Сирийн ерөнхийлөгчийг террорист улсын толгойлогч хэмээн нэрлэж байсан юм. Сирийн Арабын улсын өнөөгийн тэргүүн нь цэргийн гэмт хэрэгтэн хэмээн түүхэнд тэмдэглэгдэх болно гэж тэрээр нэмэн хэлсэн байна.