Европ болоод Хойд Америк өнгөрсөн долоо хоногоос эхлэн халдварын голомт болоод байгаа бүс нутгуудад хөл хорио тогтоож эхэлсэн бөгөөд тэдгээр нь нийт 750 сая иргэн болж байгаа аж. Үүний нөлөөгөөр барууны орнуудын хөрөнгийн зах зээл уналтад орж 40-өөс доош насны иргэдийн 30 хувь нь ажилгүй болж байгаа аж. 

Ялангуяа халдвар эрчтэй тархаж байгаа Итали, Их Британи, Испани, Франц, АНУ зэрэг орнууд Дэлхийн 2-р дайны үеэс хойших хамгийн хатуу дэг журам бүхий хуулийн төслүүдийг баталж эхлээд байгаа юм. ДЭМБ энэхүү шийдвэрийг дэмжиж байгаа бөгөөд бусад орнууд ч мөн ийм алхам хийхийг зөвлөж байгаа аж.

ДЭМБ-ийн төлөөлөгч Тэдрос Адханом "Ердөө 4 хоногийн дотор халдвар авсан иргэдийн тоо 200 мянгаас 300 мянга болж нэмэгдлээ. Ийм байхад бараг цэргийн дэглэм тогтоох хэрэгтэй" гэж мэдэгдсэн байна.

Одоогийн байдлаар дэлхий даяар халдвар тээсэн хүмүүстэй хавьталд орсон 8.4 сая иргэд байгаа бөгөөд тэдгээрийг тусгаарлан шинжилгээ хийхэд 74 тэрбум гаруй ам.доллар зарцуулах төлөвтэй байгаа юм. 

Хэдийгээр халдварын голомт болоод байгаа Итали оронд халдвар авсан болоод нас барсан хүний тоо буурч байгаа ч нөхцөл байдал тийм ч ихээр дээрдсэнгүй. Эрүүл мэндийн сайд Андре Гуомо "Үүнээс илүү хүнд үе ирж байгаа гэж бодоорой. Түүнийг туулж гарсан цагт л бид нэг юм санаа амар байж болно" гэсэн байна.

Италид нийт 43 сая гаруй иргэд хөл хорионд ороод байгаа бөгөөд гэрээс гарахын тулд явах маршрутаа засгийн газрын сайтад мэдээлж зөвшөөрөл авах ёстой болжээ. Мөн тус улсын иргэд гар утас, интернетээ салгах эрхгүй, гадагш зөвшөөрөлгүй гарсан тохиолдолд 5,000 гаруй еврогийн торгууль төлж байгаа гэнэ.

Хятадад 300 гаруй сая иргэд хөл хорионд байгаа хэвээр боловч гадаадаас зарим төрлийн нислэгийг хүлээж авч эхэлжээ. Мөн тус улсын эрх баригчид европын орнууд руу амны хаалт болоод эм тариаг олноор нь илгээж байгаа юм байна. 

"АНУ өөрийгөө эмчлэх гэж оролдож байх хооронд Хятад дэлхийг өөрийн болгож байна" Хятадын засгийн газрын төлөөлөгч Гэнг Шуан хэлжээ. 

АНУ-д нэг өдрийн дотор 10 мянган хүн халдвар авсан бөгөөд энэ тоо цаашдаа ч нэмэгдэх хандлагатай байна. Учир нь олон иргэд хөл хорионы анхааруулгыг тоолгүй гадуур зугаалах нь нэмэгдэж байгаа юм. 

Одоогийн байдлаар дэлхий даяар 380 мянган иргэн коронавирусийн халдвар аваад байгаа бол 16,500 хүн нас бараад байгаа аж.