Дэлхий даяар коронавирусийн халдварын тархалт хяналтаас гарч эхэлсэн энэ үед хамгийн хэрэгцээтэй зүйл нь амны хаалт, бээлий зэрэг хамгаалалтын хэрэгслүүд болжээ. Харамсалтай нь тэдгээр бүтээгдэхүүний эрэлт огцом нэмэгдсэнээс болоод дэлхий даяар хомстол үүсч эхэлсэн байна. Үүнээс болоод олон орон, тэр дундаа томоохон гүрнүүд хоорондоо амны хаалтын төлөө тэмцэлдэж эхлээд байна.
Саяхан АНУ Франц улсын захиалсан 60 сая ширхэг амны хаалтыг үйлдвэрлэгчид нь 3 дахин илүү үнэ санал болгон замаас нь булаан авсан юм. Энэ үйлдлийг нь олон улс орон шүүмжилсэн бөгөөд Францын хэвлэлүүд уг явдлыг "guerre des mas masque" буюу “Маскны төлөөх дайн” хэмээн нэрлэжээ. АНУ-ын тал ийм зүйл болсон гэдгийг үгүйсгэж байгаа ч Францын тал олон улсын шүүхэд зарга үүсгээд байна.
Үүний зэрэгцээ Германы эрүүл мэндийн яамны өндөр албан тушаалын ажилтан Андреас Гейзел “АНУ орчин үеийн далайн дээрэм хийж байна. Нөхцөл байдал ямар ч байсан ийм арга хэрэглэж болохгүй шүү дээ.” хэмээн мэдэгджээ. Хятадаас Герман руу далай руу тээвэрлэж байсан 20 сая ширхэг амны хаалтын АНУ мөн дээрхтэй адил аргаар замаас булаан авсан ажээ.
Канадын Ерөнхий сайд Жастин Трьюдо үүнтэй адил зүйл болох бүрэн боломжтой хэмээн мэдэгдэж захиалсан амны хаалт нь эх оронд нь бүрэн бүтэн ирэхэд нь санаа тавихыг албаны хүмүүст үүргэджээ. Мөн Чех, Итали зэрэг орнууд хэдэн арван мянган амны хаалт замаасаа алга болсон бөгөөд яг хэн үүнд буруутай болохыг тодруулахаар ажиллаж байна.
АНУ энэ зуур дотоодын амны хаалт үйлдвэрлэгч нарыг гадаадын орнууд руу экспорт хийхийг тодорхойгүй хугацаагаар хоригложээ. Тус улс нь дэлхийн амны хаалтын зах зээлийн 15 хувийг дангаараа бүрдүүлдэг бөгөөд ДЭМБ энэхүү үйлдлийг нь шүүмжилсэн юм.
Энэ хооронд засгийн газрууд болгоомжлох үүднээс холбоотнуудаасаа хүртэл "урваж" эхэлжээ. Өнгөрсөн сард л гэхэд Францын засгийн газар тус улсад хийгдсэн бүх маскыг хураан авч байгаа гэж мэдэгдсэн.
Францын "Valmy SAS" компанийн байнгын үйлчлүүлэгч болох Их Британийн Үндэсний эрүүл мэндийн алба их хэмжээний амны хаалтын захиалга өгчээ. Харамсалтай нь тус компанийн Их Британид суугаа төлөөлөгч Францын гаалийн ажилтнууд захиалсан барааг нь хилээрээ гаргахыг хориглосон гэж мэдэгдсэн байна.
Европын хэд хэдэн засгийн газар эрүүл мэндийн ажилчдаа хүртэл хамгаалах хэрэгслээр хангахад авахад бэрхшээлтэй байгаа тухай мэдээлэв. Германд Бавари мужийн захирагч Маркус Сёдер пүрэв гаригт коронавирусын эсрэг тэмцэхэд Герман улсад "олон тэрбум маск" хэрэгтэй болно гэжээ.
Германы эрүүл мэндийн сайд Йенс Спан Герман өөр газар хийсэн маскаас Герман хамаарал багатай байхыг хүсч байгаагаа мэдэгдэв. "Бид иргэдийнхээ аюулгүй байдлын төлөө олон улсын зах зээлээс илүү хараат бус байх ёстой." гэж тэр твиттер хуудсандаа мэдэгджээ.
Испанийн Эрүүл мэндийн сайд Сальвадор Илла өнгөрсөн долоо хоногт: "Дэлхийн зах зээл хангалттай маск үйлдвэрлэхгүй байна; агааржуулалт хангалтгүй байна" гэж хэлэв.
