Ойрын ирээдүйд хэд хэдэн улс дефолт зарлаж магадгүй
Ойрын ирээдүйд хэд хэдэн улс дефолт зарлаж магадгүй гэж J.P. Morgan International-ын зах зээлийн хэлтсийн удирдагч Дэвид Стаббс үзэж байна.
"Ер нь хөгжиж байгаа улсад хөрөнгө оруулж буй хүмүүс нь иймэрхүү зах зээлд олон удаа тохиолдож байсан дефолт хэмээх зүйлийн тухай санаж байх ёстой" гэж тэрээр хэлээд сүүлийн хэдэн 10 жилд цөөнгүй орнууд дефолт зарлаж, өр төлөх үүргээ биелүүлэхээс татгалзсан гэдгийг сануулсан боловч чухам ямар улсыг хэлж байгаагаа тодруулаагүй байна.
Экспертийн үзэж байгаагаар хамгийн гол асуудал бол дефолтдоо биш харин дефолт зарлах болсон шалтгаан бөгөөд "хэрвээ эдийн засаг нь дефолт зарлах хэмжээнд тулан ирсэн бол, үгүйдээ энэ тухай бодол төрж эхэлсэн бол байдал аль хэзээний эвгүй тийшээ эргэсэн гэсэн үг" гэжээ.
3-р сарын 12 ны The Independent-д 2008 оны санхүүгийн хямралыг урьдчилан харсан эдийн засагч Жесси Коломбо нь дэлхий нийт дахин нэг санхүүгийн хямралд тулж ирсэн гэж хэлсэн тухай сануулжээ. Америкийн энэ экспертийн үзэж байгаагаар одоо дэлхийн зах зээлд хэд хэдэн томоохон хөөс үүссэн, тэдгээр нь хэзээ мөдгүй хагарч магадгүй, мөн коронавирусийн тархалт нь угаасаа хүндхэн нөхцөл байдлыг улам бүр дордуулж байгаа гэдгийг анхааруулсан байна.
ОПЕК+, болон нефтийн үнэ 30$ хүртэл унасан нь эдийн засагт муугаар нөлөөлөх бас нэг үндсэн шалтгаан болж байна.
Өнгөрсөн оны 9-р сард Америкийн тэрбумтан, Bridgewater Associates компанийг үүсгэн байгуулагч Рей Далио нь өнөөгийн эдийн засгийн байдал нь санхүүгийн томоохон хямралын өмнө тулан ирсэн байна гэсэн дүгнэлтийг хийжээ. Тэрээр Business Insider-т өгсөн ярилцлагадаа эдийн засаг нь хэдэн үечлэлтэй байдаг тухай хэлээд "Эхлээд өр болон орлого цугтаа хурдтай өсөж, үнэт цасны үнэлгээ ч огцом дээшилсээр удалгүй хэт их өсөн нэмэгдэж байгаа өрийг багасгахын тулд төв банкнууд мөнгөний бодлогоо чангалж эхэлнэ. Дараа нь бодлогын хүү бараг 0 болтол буурч, эдийн засаг уналтад орох ба төв банкнууд үнэт цааснуудыг бөөнөөр худалдан авч мөнгөний бодлогоо ихээхэн зөөлрүүлдэг" гэсэн байна.
"Миний бодлоор эдийн засгийн одоогийн байдал маань яг л өнгөрсөн зууны 30-аад оны үе, их хямралын өмнөх үеийг санагдуулж байна" хэмээн тэрээр анхааруулжээ.
Ийм нөхцөлд баян хоосны ялгаа улам бүр ихсэх бөгөөд энэ нь аливаа нэг популист үйл ажиллагаа эрчимжих нэг үндэс болдог гэж энэ тэрбумтан үзэж байгаа юм байна.
Дэлхийн эдийн засаг бас нэг хямралын өмнө ирээд байгаа тухай олон жил ярьж байгаа бөгөөд 2018 оны 7-р сард Bank of America Corp нь өнөөгийн эдийн засгийн өсөлтийн байдал нь 1997-1998 оны хямралын өмнөх үетэй яг адилхан байгаа гэж хэлээд зах зээлийн бүх л чиглэл, нөхцөл байдлыг судлан үзээд ойрын үед 1998 онд болсон үйл явдал буюу Азийн бүсэд эдийн засгийн том хямрал болж, Орос улс дефолт зарлаж байсан тэр явдал дахин давтагдах магадлал өндөр байна хэмээн энэ банкны мэргэжилтнүүд хэлж байжээ.
"АНУ-ын эдийн засгийн тогтвортой өсөлт болон хөгжиж буй орнуудын облигацын орлогын өөрчлөлт зэргийг харахад 20 жилийн өмнөх явдалтай тун адилхан байна" хэмээн Bank of America –ийн хөрөнгө оруулалтын тоймч Майкл Хартнетт мөн хэлж байсан юм.
Орос улсын хувьд 1998 оны дефолт нь тус улсын эдийн засгийн хамгийн том хямрал байсан бөгөөд Оросын засаг төр дампуурлаа зарлан өр төлбөрөө төлж чадахгүй болсон билээ. Тухайн үед төсвийн орлого 40%-аар буурч, рублийн ханш 1998 оны төгсгөл гэхэд гурав дахин унасан байна.
