Нийтийн сүлжээнд найз санал болгох хэсэг байх нь маш элбэг байдаг. Энэхүү систем нь тухайн хэрэглэгч болон түүнд санал болгож буй хэрэглэгчийн дундын найз болон нийтлэг талыг ашиглан тодорхой зүй тогтлыг олсны дүнд санал болгодог билээ. Үүнтэй адил судлаачид өөр өөр уураг болон гений харилцан үйлчлэлд суурилсан биологийн сүлжээний схемийг бий болгож байгаа юм. Энэхүү шинэ судалгаанд “хиймэл мэдрэлийн сүлжээ” гэх хиймэл оюун ухааны системд судалгааны мэдээллийг оруулан  биологийн сүлжээний талаар суралцах боломжтой эсэхийг судалсан байна. Энэхүү хиймэл мэдрэлийн сүлжээ нь маш олон тооны өгөгдлийг боловсруулахдаа сайн бөгөөд  дүрс таних зэргээр ашиглагдаж байна. Энэхүү систем нь өнөөг хүртэл маш бага хэмжээнд биологийн судалгаанд ашиглагдсаар иржээ.

“Бид анх удаа энэхүү гүн суралцах(deep learning) аргыг ашиглан эмгэгт генийг олж таньсан. Энэ арга нь биологийн маш их хэмжээний буюу томоохон өгөгдлийг тайлах үр дүнтэй арга юм” хэмээн Линьшөпин их сургуулийн физик, хими болон биологийн тэнхимийн доктор Санжив Двиведи хэлжээ.

Судлаачид хүмүүсийн 20000 гаруй гений илэрхийллийн мэдээлэл бүхий томоохон мэдээллийн сангийн өгөгдлийг ашиглан энэхүү судалгааг явуулжээ. Энэхүү мэдээллүүдэд эрүүл болон эмгэгтэй гэх ангиллыг өгөөгүй бөгөөд тус хиймэл мэдрэлийн сүлжээ нь үүний зүй тогтлыг тайлахаар бүтээгдсэн байна.

Энэхүү системийн нэг асуудал нь тухайн өгөгдлийг хэрхэн боловсруулж байгаа талаар мэдэх аргагүй байгаа юм. Хиймэл оюун ухааныг “хар хайрцаг” хэмээн нэрлэх нь олон бөгөөд бид зөвхөн оруулж буй мэдээлэл болон гарч ирж буй мэдээллийг харах боломжтой. Энэхүү хиймэл мэдрэлийн сүлжээний дундын үе шатуудыг ойлгох боломжтой эсэх нь эрдэмтдийн анхаарлыг татаж байна.

“Бид энэхүү нууц шатын эхний үйлдлийг тайлахад их хэмжээний, олон төрлийн уургууд хоорондын харилцан үйлчлэлийг илэрхийлж байсан ба түүнээс цааш өөр өөр төрлүүдийн эсийн бүлэгт хуваасан байхыг олж харсан. Ангилагдаагүй мэдээллүүд нь биологийн хамааралтай бүлэгт автоматаар хуваарилагдан боловсруулагдсан нь сонирхолтой” хэмээн физик, хими болон биологийн тэнхимийн ахлах багш Мика Густаффсон хэлжээ.

Судлаачид гений илэрхийллийг зүй тогтлоор нь хэвийн болон эмгэгтэй хэмээн ангилах боломжтой эсэхийг судалсан. Энэхүү системийн ангилал нь биологийн механизмд сайн нийцэж байсан бөгөөд өгөгдлийг ангилалгүй оруулсан учир цоо шинэ зүй тогтлыг олох магадлалтай юм. Судлаачид мөн өмнө мэдэгдэж байгаагүй гений илэрхийлэл нь биологийн хувьд ач холбогдолтой эсэхийг судлахыг зорьж байна.

“Энэхүү салбарт хиймэл мэдрэлийн сүлжээг ойлгох нь гол шалгуур юм. Энэ нь бидэнд олон эх үүсвэр бүхий эмгэг зэргийн биологийн ач холбогдолтой олон шинэ зүйлийг сурахад тус болох ба энэхүү арга нь олон өөр төрлийн биологийн салбарт ашиглагдах боломжтой юм” хэмээн Мика Густаффсон хэлжээ.

Мика Густаффсон эрүүл мэндийн салбарын судлаачид түүнтэй хамтарснаар анагаах ухааны нарийн салбаруудад энэхүү арга хэрэглэгдэнэ гэдэгт найдаж байгаа бөгөөд энэхүү систем нь ямар бүлэг өвчтөнд ямар эм тохирох талаар, хэн нь илүү хүнд хэлбэрийн эмгэгтэй байгааг тодорхойлох зэрэгт ашиглагдаж болох юм.

Энэхүү судалгаа нь Шведийн судалгааны зөвлөл болон Швед стратегийн судалгааны сан(SSF) зэргээс санхүүжилт авч байна.

Эх сурвалж: ScienceDaily