Жорж Флойд цагдаа нарын гарт амиа алдсанаас үүссэн эсэргүүцлийн жагсаал АНУ-ын мужаас муж дамжин өрнөж байна. Хэдийгээр АНУ даяар коронавирусийн хөл хорио тогтоогоод байгаа ч хүмүүс түүнийг үл тоон олноороо цугларан эсэргүүцлээ илэрхийлэх болов.
Өнгөрсөн долоо хоногийн даваа гаригт цахим орчинд нэгэн цагдаа 46 настай өнгөт арьст эрийг баривчлах явцдаа хүзүүн дээр нь 8 минут орчим өвдөглөж улмаар залууг үхэлд хүргэсэн аймшигтай бичлэг цацагдаж олон нийтийн дургүйцлийг ихэд хүргэсэн юм.
Флойдын хүзүүг өвдөгдөн амийг нь хороосон офицерыг баривчилж, хүний амь хороосон гэх хэрэг тулгаад байгаа ч жагсагчид хэргийн газарт цуг байсан бусад гурван офицерыг баривчлахыг шаардаж байгаа аж.
Миниаполис хотод цагдаа нар иргэд рүү нулимс асгаруулагч хий цацаж байгаа бол Сиэттл хотод бүрэн хуягаар тоноглогдсон цагдаа нар жагсаал болж буй гудамж бүрийг бүсэлж эхлэв. Филадельфи хотод цагдаа нар жагсагч нарыг хөл хориог зөрчсөн гэдэг үндэслэлээр гадуур явсан хүн бүрийг баривчилж эхлэв.
Цагаан ордны эргэн тойронд эсэргүүцлийн жагсаал өрнөж эхэлсэн учраас Үндэсний Гвардын 2000 цэрэг Вашингтон хотод ирсэн байна.
Наад зах нь 25 хотуудад онц байдал зарлаж, олон тооны мужууд Үндэсний Гвардын тусламжийг хүсэх болжээ.
Сүүлийн 24 цагийн байдлаар дараах үйл явдлууд жагсаалын үеэр болж өнгөрсөн байна.
- Хөл хорио: Манай цагаар дараа гарагийн өглөө 09:00 цаг хүртэл Атланта, Филадельфи, Милуоки зэрэг хотуудад бүрэн хэмжээний хөл хорио тогтоосон бөгөөд энэ үеэр гадагш гарсан хүнийг шууд баривчлах гэнэ. Денвер, Цинциннати, Луисвилл, Солт Лэйк Сити зэрэг хотуудын дарга нар мөн даваа гарагийн орой хүртэл онц байдал зарлаад байна.
- Үндэсний Гвард: Миннесота, Жоржиа, Огайо, Колорадо, Денвер, Кентакки зэрэг 6 муж Үндэсний Гвардаас тусламж хүссэн байна.
- 21 настай залуу буудуулав: Баасан гарагийн орой нэгэн залуу эсэргүүцлийн жагсаал болж байсан Детройт хотын төвд буудуулан амиа алджээ. Цагдаа нар хохирогчийг 21 настай байсан гэж мэдэгдсэн бөгөөд хэн буудсан болохыг тогтоож чадаагүй байна.
- Баривчилгаа: Лос Анжелес дахь баасан гарагийн шөнийн эсэргүүцлийн үеэр 500 гаруй хүнийг баривчилжээ гэж цагдаагийн төлөөлөгч мэдэгдэв. Нью-Йорк хотын цагдаа нар эсэргүүцлийн ажиллагаатай холбоотойгоор 200 гаруй баривчлагдсан бөгөөд арав гаруй алба хаагч хүндээр бэртсэн гэж тус хотын цагдаагийн газрын эх сурвалж мэдээллээ. Хьюстонд 200 орчим хүн баривчлагдсан бөгөөд ихэнх нь замын хөдалгөөнд саад учруулсан хэрэгт буруутгагдахаар болжээ.
- Амар амгаланг хүсч байна: Даллас хотын дарга Эрик Жонсон олон нийтийн болоод бусдын өмч хөрөнгийг сүйтгэж буй хүмүүс зогсохыг шаарджээ. Орегон мужийн Портланд хотод цагдаа нар эсэргүүцэгчид рүү нулимс асгаруулагч хий цацсан ч нэмэр болоогүй гэнэ. Тус хотын дарга Тед Уилер "Дор хаяж 150 сая ам.долларын хохирол учирсэн, энэ тоо цаашид нэмэгдэнэ" хэмээн твиттер хуудсаараа жиргэжээ.
Эх сурвалж: CNN, CNBC
Эсэргүүцлийн жагсаалыг шууд үзэх
