Норвегийн эмч нар өвчтнүүдээ капсулд тусгаарлаж байна
Халдвартай хүмүүстэй ажилладаг эмч нарын аюулгүй байдал, мөн коронавирусын тархалтыг дарах нь цар тахлын энэ үед үндэсний эрүүл мэндийн системийн гол зорилго болоод байна. Тиймээс үр дүнтэй аргыг Норвегийн төслийн оролцогчид санал болгож байгаа юм.
Осло хотын "EpiGuard" компани өвөрмөц хөдөлгөөнт тусгаарлагч боловсруулжээ. "Epishuttle" гэх нэртэй энэ тусгаарлагч нь зөвхөн тээврийн хэрэгсэл бус өндөр технологийн эмнэлгийн капсул бөгөөд үүний тусламжтайгаар нэг газраас нөгөөд хүрэх үед өвчтөнүүдэд тусламж үзүүлэх боломжийг олгох юм. Эмч, сувилагч нар халдвар авна гэж айлгүй өвчтөний хажууд байж биеийн байдлыг нь хянах боломжтой аж.
Компанийн гүйцэтгэх захирал Элен Андерсений ярьснаар "Хямралын оргил үед коронавирусын халдварыг эмнэлгийн ажилтнууд авч байгааг бид анзаарсан. Миний бодлоор хүн болгоны хувьд ажиллаж буй газраа аюулгүй байгаагаа мэдрэх нь чухал. Энэ нь ялангуяа өвчтөнүүдийг тээвэрлэдэг хүмүүст илүү хамаатай. Тэдгээр хүмүүс тусламжийн машин эсвэл онгоцонд өвчтөнүүдтэй маш ойрхон байдаг".
Капсулан тээврийн хэрэгсэл зохион бүтээх санаа нь анх Эбола гарч байхад үүссэн: тэр үед Африкт ажиллаж байсан Норвеги эмч халдвар авч нутагруугаа яаралтай буцах шаардлагатай болж байсан. Үүний дараа Осло хотын эмч болон инженерүүд ханцуй шамдан ажилдаа орсон ба тэдний сонголт бүх төхөөрөмжтэй холбогдсон капсул дээр тогтсон аж. Тэрхүү капсулд өвчтөний эмчилгээг зогсоож амийг нь эрсдэлд оруулалгүйгээр тээвэрлэх боломжтой.
"EpiGuard" компанийг үүсгэн байгуулагч Фритёф Хейердал эмчийн хэлснээр "Өвчтөнийг зөөвөрлөх үед халдвар авах эрсдэлтэй гэж санаа зоволгүйгээр түүнд туслах нь маш чухал. Бүрэн эмчилгээ хийх боломжийг энэ капсул олгодог. Жишээлбэл, механик агааржуулалтыг хангаж, өвчтөнийг зөөвөрлөх боломжийг капсул олгодог ба өвчтөний судсанд порт суулгасан байдаг учир түүний эмийг үргэлжлүүлэн өгөхөд асуудалгүй. Үйлчлүүлэгчийнхээ байдлыг судсаар эсвэл артерийн хяналтын системээр хянах боломжтой".
Эмнэлгийн капсул нь Эбола эсвэл шинэ коронавирус, сүрьеэ болон бусад халдварт өвчтөнүүдийг зөөвөрлөхөд туслах юм. Гол давуу тал нь түргэний тэрэг болон онгоцыг цэвэр үлдээх боломжтой. Капсулыг тээврийн хэрэгслээс гаргахад л хангалттай, ариутгах шаардлагагүй.
Эмч нарын санааг бодит болгохын тулд инженерүүд болон зохион бүтээгчид тусалсан байна. "Eker design"-ий ажилтан Виктор Розенвингегийн үзэж буйгаар эргономик тусгаарлагч, тунгалаг хана нь урт удаан замд өвчтөнүүдийн стрессийг багасгана, мөн орны байрлалыг солих боломж нь тав тухтай байх боломжийг олгож байгаа аж.
Норвеги, Шотланд, Дани, Герман болон Бельгийн зарим эмнэлэг, нисэх хүчнийхэн аль хэдийнээ ийм капсултай болсон байна. Тэд уг капсулыг эмнэлгээс хол зэлүүд байрлах газруудаас өвчтөнүүдийг зөөвөрлөхдөө ашигласан байна.
Эх сурвалж: ru.euronews.com
