Хятад улс Бэйдоу буюу байршил заагч технологийн сүлжээгээ бүрэн ажилд нь оруулахаар сүүлчийн хиймэл дагуулаа өнгөрөгч мягмар гаригт хөөргөсөн бөгөөд уг систем нь дэлхийн хэмжээнд өргөнөөр ашиглагддаг GPS-системийн гол өрсөлдөгч болох болно гэж үзэж байна.
Өнөөдрийг хүртэл цөөн тооны байршил заах технологи ашиглагдаж байсан бөгөөд GPS системийг АНУ болон олон оронд, GLONASS-г ОХУ, Галилео-г Европын холбоо ашигладаг бол одоо Хятад улсын Бэйдоу систем бүрэн ашиглалтад орлоо. Мөн түүнчлэн Энэтхэг болон Япон улс харьцангуй бага хэмжээтэй системийг улс орныхоо хэрэгцээнд ашиглаж байна.
Ихэнх хүмүүс утасныхаа байршлыг илрүүлэх, явж буй зам байршлаа тэмдэглэхээс эхлээд онгоцны нислэг, ачаа тээврийн байгаа байршил зэргийг шалгах гэх мэт маш олон үйл ажиллагаанд ашигладаг учир GPS системийг илүү мэддэг нь дамжиггүй.
Хятадын Ардын Армийн Олон нийтийн асуудал хариуцсан төлөөлөгч Сон ЖонПин: Хэдийгээр GPS систем одоо ч гэсэн зах зээлд өндөр үзүүлэлттэй, хувьцааны үнэ өндөр гэх мэт шалтгаанаар голлох хүчин болж байгаа гэхдээ Бэйдоу төсөл GPS технологитой олон улсын хэмжээнд өрсөлдөх боломж байгаа гэж мэдэгдээд байна.
Олон улсын мэргэжилтнүүдийн үзэж байгаагаар Хятад улсын байршил заагч төхөөрөмж хөгжүүлж байгаа гол зорилго нь Америкаас хараат бус байх ялангуяа цэрэг зэвсэглэлийн хувьд бие даасан байх зорилготой гэж үзэж байгаа юм.
Сансрын Инженерчлэлийн Судалгааны төвийн Австрали дахь салбарын тэргүүн Эндрью Дэмпстер: Улс орон өөрсдийн гэсэн системтэй байхад цөөн хэдэн давуу талтай. Гэхдээ үнэн хэрэгтээ Бэйдоу-гын хувьд тийм ч өвөрмөц эсвэл бусдаас онцлог тал байхгүй гэж хэлжээ. Энэ нь Хятад улс өөрсдийгөө ийм системтэй гэж бусдад хэлэх онцлогтой байх гэсэн л оролдлого. Яг л хүйтэн дайны дараа улс орнууд сарыг эзэгнэж, түрүүлж тугаа зоохын тулд тэмцэж байсантай ижил зүйл гэжээ.
GPS технологийн хувьд хүйтэн дайны дараа АНУ болон ЗХУ байршил заах системийг хөгжүүлэхийн төлөө уралдаж эхэлсэн. GPS-г 1973 онд АНУ-н Батлан Хамгаалах Яам бий болгосон бол ОХУ GLONASS технологио үүнээс 6 жилийн дараа буюу 1979 онд ашиглалтад оруулжээ. Гэсэн ч хоёр улс аль аль нь тухайн технологийг 1975 онц бүрэн ашиглаж байгаа гэж мэдэгдээд байсан юм.
Сон ЖонПин-ий мэдэгдэж байгаачлан Бэйдоу систем Орос улсын туршлагатай адил хэсэгчилсэн байдлаар цэрэг зэвсэглэлийн шаардлагаар ашиглагдах ажээ.
Демпстерийн сүүлд өгсөн мэдэгдлийн хэсэгт Хэрэв Хятад улсын өмнөд далайн хэсэгт хоорондын тэмцэл үүслээ гэж бодоход Америк улс GPS технологийг хязгаарлах хэдий ч өөрсдийн хүчиндээ ашигласаар байх болно. Тиймээс өөрсдийн технологитой болох нь Хятад улсын хувьд маш том ашигтай гэжээ.
Эх сурвалж: CNN
