Коронавирус тараасан Өмнөд Солонгосын сүмээс 82 сая ам.доллар нэхэмжилжээ
Өмнөд Солонгосын Дэгү хотын удирдлагууд коронавирусын 5000 орчим тохиолдол үүсэхэд нөлөөлсөн Христын сүмийг өвчний хохирлын төлбөр болох 100 тэрбум вон буюу 82 сая ам.доллар нэхэмжилж шүүхэд өгөөд байна.
Өмнөд Солонгосын албан ёсны мэдээллээс үзэхэд хотын удирдлагууд Дэгү мужийн шүүхэд өнгөрсөн долоо хоногт Шинчеонжи Христын сүм болон уг сүмийг үүсгэн байгуулагч Ли Ман Хи-д холбогдох хэргийн нөхцөл болгож иргэний хэрэгээр зарга мэдүүлээд байгаа юм.
Уг сүм нь хотыг хөл хориотой байх үед хоригийг зөрчиж олон тооны сүсэгтэн цуглуулснаар хэдэн мянган хүнд халдвар тарах нөхцөлийг үүсгэсэн билээ.
Сүмийг Ли Ман Хи 1984 онд үүсгэсэн бөгөөд 250,000 орчим гишүүд, сүсэг бишрэлтнүүдтэй болтлоо өргөжсөн бөгөөд ихэнх гишүүд нь Өмнөд Солонгост байдаг байна. Уг сүмийн сүсэгтэн 2020 оны 02-р сарын 18-нд коронавирусын шинжилгээнд эерэг үр дүн үзүүлсэн бөгөөд цаашид бусад хавьтагч нарыг шалгахад аль хэдийн 2000 орчим тохиолдол бүртгэгдсэн юм. Уг хэрэг илрэх хүртэл сүм хорио цээрийг зөрчин олон тооны сүсэгтнүүдтэй томоохон уулзалтуудыг зохион байгуулсаар байсан ажээ.
Уг нөхцөл байдлаас болж Өмнөд Солонгос улс Хятадын дараагаар орохоор хамгийн өндөр дэгдэлт бүхий орны тоонд шууд орсон билээ. Гэвч уг бүх асуудал зөвхөн Шинчеонжи Христын сүмээс болсон асуудал байв.
СBS агентлагийн мэдээлснээр Дэгү хот цар тахлын дэгдэлтийг хязгаарлахын тулд их хэмжээний хөрөнгө зарцуулсан бөгөөд 121 сая орчим ам.доллар зарцуулаад байна. Хотын удирдлагуудын мэдээлснээр сүм гишүүдийнхээ мэдээллийг бүрэн өгөхгүй байгаагаас асуудлыг хүндрүүлээд байгаа юм байна. Мэдээлэл дутуу байгаа улмаас бусад халдвар авсан байж болохуйц иргэд болон мөн түүнчлэн сүмийн буруутай үйл ажиллагаанаас болж үүссэн хохирлыг бүрэн тодорхойлоход хүндрэлтэй байгаа юм.
Өнгөрсөн гуравдугаар сард Сөүл хотын дарга уг сүмийг хүн амины хэрэг болон бусад холбогдох хэргүүдээр шүүхэд өгсөн билээ. Ли Ман Хи олон нийтийн хэрэгслээр нийт ард түмнээс гоц халдварт цар тахлыг тараасан бурууг хүлээж, уучлалт гуйсан юм.
Өнгөрөгч Лхагва гаригийн мэдээгээр одоогоор өмнөд Солонгос улсад 12,535 тохиолдол илэрч 281 хүн амь насаа алдаад байгаа юм.
Эх сурвалж: CBS
