Дэлхий дээрх хүн амын тал хувь нь буюу 3.8 тэрбум хүн интернет ашиглах боломжгүй байна. Гэсэн хэдий ч энэ байдал тун удахгүй өөрчлөгдөх бололтой. Элон Маск SpaceX төслөөрөө задгай сансарт дэлхийгээс 340 милийн (547км) зайд хиймэл дагуулын сүлжээ үүсгэж интернетээр хангахыг зорьж байгаа билээ. Харин энэ үед Google-н охин компани “Loon” ижил төстэй зүйл бүтээж байгаа ажээ.
Loon компанийн төсөл нь дэлхийн агаар мандлаас буюу зөвхөн 12 милийн (19.5км) өндрөөс тэнгэрт хөвж буй агаарын бөмбөлгөөр интернет түгээх аж. Өчигдөр орой Loon компанийн мэдээлснээр Кени улсыг интернетээр хангаж байгаа бөгөөд интернетийн хүрээ нь 51800 орч кв.м талбайг хамарч байгаа ажээ. Кени улсын 35,000 орчим иргэн аль хэдийн интернетэд холбогдоод байна.
Интернетээр хангахын тулд агаарын бөмбөг ашиглаж байгаа нь тун ч эрсдэлтэй, хялбар эвдрэх боломжтой санагдаж байна. Хэрэв салхины урсгал огцом өөрчлөгдөж, бөмбөлгийг өөр тийш зөөвөл яаж зорилтот хэрэглэгчдээ интернетээр хангах вэ? гэсэн асуултад Loon компанийн ерөнхий захирал Аластайр Вестгард: Бидний бүтээсэн агаарын бөмбөлөг, эсвэл бидний нэрлэж байгаагаар нисдэг тээврийн хэрэгслүүд дэлхийн агаар мандлын салхины урсгалд хөөрч, доор байрлах газрыг интернетээр хангана. Хаана байршиж байгаагаасаа шалтгаалж нисдэг тээврийн хэрэгслүүд тогтмол хэрэглэж байгаа хэрэглэгчдийн хэрэглээ, салхины урсгал зэргээс шалтгаалж өөрийн байрлалаа өөрчилж, эсвэл буцаад байрандаа ирж чадна. Маш хялбараар тайлбарлах юм бол, агаарын бөмбөлгүүд өөрсдөө хаана очихоо шийдэж, байрлалаа тохируулж чадна. Бид агаарын бөмбөлгийг хиймэл оюунаар удирдаж байгаа бөгөөд туршилтын эхний шатанд 1 сая цагийн турш хөөргөж, 4 сая орчим км газрыг туулсны хүчинд хиймэл оюун өөртөө сүлжээг хамгийн өндөр хувьтай байлгахын тулд ямар төрлийн салхийг сонгож хаашаа явахаа тооцоолж чаддаг болсон гэжээ.
Loon компанийн технологи хариуцсан ахлах ажилтан Салваторе Кандидо: Зөвхөн салхин дагууд хөөрөх биш өндрийн хэмээ тохируулж, дээшилж доошлох боломжтой тул хамгийн тохиромжтой байрлалд орох хүртлээ агаарын бөмбөг байршлаа өөрчлөх болно. Агаарын бөмбөлгийн ашиглах хугацаа дуусах хүртэл ийм байдлаараа ажиллаж, салхины урсгалын тусламжтай дэлхийн хаана ч интернет түгээх боломжтой болж байна гэжээ.
Loon уг агаарын бөмбөлгийг 30 минут тутамд нэгийг хөөргөх хүчин чадалтай бөгөөд агаарын бөмбөлөг тус бүр үүргээ гүйцэтгэж газардах хүртэл 100 орчим өдөр агаарт ажиллах чадвартай байна. Бөмбөлөг тус бүр 10000м.кв талбайг интернетээр хангах чадамжтай бөгөөд бидний хэрэглэдэг уламжлалт утасны долгионы станцаас даруй 200 дахин өндөр хүчин чадалтай юм.
Агаарын бөмбөлгийг нарны зай хураагуураар цэнэглэх бөгөөд хэрэглэгчид ямар ч төрлийн төхөөрөмжөөр интернетэд холбогдох боломжтой болох юм. Үүргээ гүйцэтгэсний дараа төхөөрөмжийн шүхэр задарч газардах бөгөөд дахин цэнэглэхийн тулд газарт бууж ирэх байна.
Интернетийн хурд тун боломжийн бөгөөд холбогдох хурд нь 5мб/с, татах хурд нь 19мб/c байна.
Мөн түүнчлэн Loon компани уг үйлчилгээг гэнэтийн эрсдэл, аюулт үед ашиглахаар төлөвлөж байгаа бөгөөд газар хөдлөлт зэрэг хүндрэлийн дараа холбоо барих аргагүй болох үед хэрэглэхээр төлөвлөж байгаа юм. Тэд уг бүтээлээ маш боломжтой сонголт гэж үзэж байгаа бөгөөд сансраас интернетээр хангахаас хямд төсөр мөн уламжлалт утасны сүлжээнээс илүү өргөн цар хүрээг хамарна гэж мэдэгдсэн.
Дэлхийг ирээдүйд хөтлөх шинэ нээлтүүд улам бүр гарсаар байгаа бөгөөд мөн түүнчлэн SpaceX хөтөлбөрийг хэрэгжиж эхлэхийг ч мөн хүлээх л үлдлээ.
Эх сурвалж: Forbes
