2017 оноос хойш сөрөг үйл ажиллагаа явуулдгаараа нэр нь танигдсан “Ghostwriter” гэх хочтой хакер саяхнаас дахин хэвлэл мэдээллийн байгууллагын мэдээллийн санд нэвтэрч хуурамч мэдээллүүд тарааж эхэлсэн байна.

Улс төр судлаачид үүнийг НАТО-гийн Латви, Литва болон Польш улсад авч хэрэгжүүлж байгаа арга хэмжээг дэмжигчдийн дэмжлэгийг сарниулах зорилготой гэж үзэж байгаа юм. Уг мэдээллүүдээс үүдэн гарах үр дүн нь НАТО-ийн эсрэг чиглэж, ОХУ-д ашигтай байдал үүсгэх учир энэ бүхний ард хэн байгаа нь тодорхой гэж зарим эх сурвалжууд ч мэдэгдээд байгаа юм.

Уг халдлагад өртсөн мэдээллийн сайтууд нь маш олон тооны нийтлэлүүдийг оруулдаг бөгөөд ихэвчлэн сэтгүүлчид, редакторуудын урьдчилан бэлтгэж, хянасан мэдээллүүдээр мэдээллийн сан бүрдүүлж, дараагаар нь тогтоосон нийтлэх системийн томьёоллын дагуу компьютероос автоматаар нийтлэгддэг байна. Халдагчид уг хэвлэх системд нэвтэрч чадсан бөгөөд улс төрчид, цэрэг зэвсгийн үйл ажиллагаа зэрэг зүйлсийг гуйвуулсан, худал мэдээллүүдийг уг санд оруулж, нийтэлж эхэлсэн байна.

Уг үйл ажиллагаагаа тэд өмнө нь ч хийж байсан бөгөөд өнгөрсөн жил гэхэд Литвийн мэдээллийн сайтад Герман цэрэг еврей иргэний оршуулгыг бузарлаж, доромжилсон тухай хуурамч мэдээ хэвлэж байсан гэнэ.

Уг мэдээнүүдийг хуурамчаар засгийн газрын албан хаагч эсвэл баталгаатай эх сурвалжаас мэдээлэл хүргэдэг албан ёсны сэтгүүлчдийн оруулсан нийтлэл мэт харагдуулахаар мэдээллүүдийг бэлдсэн байжээ. Өмнө нь ЗСБНХУ-н нэгэн хэсэг байсан Литва улсын эх сурвалжууд үүнийг Орос улсаас хийж байгаа ажиллагаа гэж үзэж байгаа тухайгаа мэдэгдсэн юм. 

Эх сурвалж: BBC