Хонконгт байрлах “Hung Hom” болон “To Kwa Wan” далайн гаралтай бүтээгдэхүүний худалдааны захад коронавирусын халдвар тараасан байж болох гол сэжигтнүүдийг муур, харх болон жоом гэж эрүүл мэндийн байгууллагын мэргэжилтнүүд үзэж буй талаарх Засгийн газрын мэргэжилтэн Юүэн Квок-Юн мэдэгдлээ.

Өнгөрсөн наймдугаар сарын 4-ний өдөр шинээр гаднаас орж ирсэн 5, өмнөх халдвартай холбоотой 43 болон үл мэдэх байдлаар халдварласан 32 гэх нийт 80 орчим шинэ халдварын тохиолдолд Хонконгт бүртгэгдсэн юм. Эдгээр тохиолдлуудын ихэнх нь дээр дурдсан хоёр далайн гаралтай бүтээгдэхүүний захын үйлчлүүлэгч болон худалдаалагчид байсан юм. Батлагдсан тохиолдлууд нь ихэвчлэн нэгдүгээр давхарт байрлах загас болон бусад хөлдөөсөн махан бүтээгдэхүүн худалдаалах тасаг болон зоорийн давхрын далайн гаралтай бүтээгдэхүүний тасгийн худалдагч, цэвэрлэгч, загасчид болон зарим хэрэглэгчид халдварласан нь батлагдсан юм.

Халдвар батлагдсаны дараа Хонконгийн удирдлагууд Ухань болон Бээжин хотод ижил төрлийн захуудаас халдвар тархсан учир, үүнээс урьдчилан сэргийлэхийн тулд захуудыг битүүмжилж, маш сайтар шалгалт хийх үүрэг өгсөн байна. Эрүүл мэндийн байгууллагын ажилтнууд уг хоёр захын мах хэрчих хэсэг, хутга, аквариумын ус, төлбөр төлөх хэсэг, мах жинлэх жин зэрэг байж болох бүх л газраас сорьц дээж авсан байна.

Уг вирус нь -4 хэмд хэдэн долоо хоног нойтон, хүйтэн орчинд идэвхжилгүй амьд байх чадвартай ажээ. Мэргэжилтнүүд вирусийн халдвар тархсан боломжийг хүнээс хүнд дамжих буюу худалдаа арилжаа хийж, тооцоо хийж байх үед халдварласан байх магадлалтай гэж үзэж байгаа ажээ. Гэхдээ үүнээс илүү сонирхол татсан нь халдвар муур, харх болон жоомоор тархсан байх магадлал өндөр байна гэж үзсэн явдал юм. Учир нь харх, муур зэрэг загасанд дуртай, загасны хаягдал сэг зэмээр хооллодог тэнүүлч муур болон харх, жоом зэрэг нь халдварыг тараасан байх гэж үзэж байгаа ажээ.

Эх сурвалж: Thestandard.com.hk