“Augmented Reality” буюу хагас бодит орчин улс төрийн компанит ажилд өөрчлөлт оруулна
Улс төрийн нам, эвсэл хүчнүүд нь иргэд сонгогчдод нөлөөлөхийн тулд олон төрлийн арга хэмжээ авдаг гэдгийг хүн болгон мэднэ. Орчин үеийн харилцаа холбооны технологи маш хурдацтайгаар хөгжиж байгаа нь улс төрийн хүчнүүдэд бусдад нөлөөлөх арга замыг нь өөрчлөх боломжийг олгож байгаа юм. Олон нийтэд нөлөөлж, мэдээлэл дамжуулж болох хамгийн энгийн бөгөөд маркетингийн зөв шийдэл болоод буй энэ арга нь олон ч улс төрийн хүчнүүдэд амжилт авч ирсэн. Үүний нэгэн жишээ нь Фэйсбүүк компанийн оролцоо АНУ-ын 44 дэх ерөнхийлөг Барак Обамаг олонхийн санал авч, сонгогдоход маш чухал үүрэгтэй байсан. Үүний дараагаар олон ч улс төрийн удирдагчид олон нийтийн цахим орчинд нөлөөлөхийн давуу талыг судалсаар ирсэн.
Мөн түүнчлэн АНУ-ын өнөөгийн ерөнхийлөг Доналд Трамп 2016 оны ерөнхийлөгчийн сонгуулийн үеэр өөрийн Твиттер хаягийг идэвхтэй ашигласнаар хэдэн сая хүнд өөрийн дуу хоолойг хүргэж, сонгогдож чадсан билээ. Манай улсын хувьд ч дурдаад баршгүй олон жишээ байгааг та надаар хэлүүлэлтгүй санаж байгаа биз.
“Augmented Reality” буюу хагас бодит орчин улс төрийн компанит ажилд хэрхэн нөлөөлөх вэ?
“Augmented Reality” буюу хагас бодит орчин гэдэг нь програм хангамжийн тусламжтай бүтээгдсэн аливаа графикыг бодит байдалтай хослуулсан хагас бодит орчин юм. Уг технологи нь компьютер доторх 3D дүрсийг гар, хулгана ашиглалгүй камераар нь дамжуулан удирдах юм. Энэ технологийг ихэвчлэн компьютер тоглоомд ашигладаг байсан хэдий ч сүүлийн үед утасны аппликэйшн хөгжүүлэг компаниуд бусад чиглэлд ашиглах боломжтойгоор хөгжүүлэхийг зорьж байгаа юм. Тэгвэл энэ технологийг улс төрд хэрхэн ашиглаж болох талаар та бүхэнд тайлбарлаж өгье.
Энэ технологийг ашиглан улс төрийн намууд өөрсдийн мөрийн хөтөлбөр болон хийгдэх ажлуудын жагсаалтыг гаргаж болох юм. Уг жагсаалтдаа хийхээр төлөвлөсөн ажлууд болон зарцуулах төсөв, гүйцэтгэл зэргийг нэмэлтээр оруулж болно.
Улс төрийн намууд “Augmented Reality” технологийг энэ байдлаар ашиглаж байна гээд төсөөлөөд үзье. Сонгуулийн сурталчилгаа хийх боломжит хугацааны үед та ердөө ганц аппликэйшн ухаалаг утсандаа татахад л хангалттай. Хотын аль нэгэн дүүрэг, бүсэд явж байх үед утсанд тань тухайн хэсэгт хийгдэх ажлууд, өөрчлөлтүүд, бүтээн босголтын тухай мэдээллүүд ирвэл ямар санагдах вэ? Шинээр босгохоор төлөвлөж буй барилгын 3D зураг нүдний тань өмнө зурайх нь телевизийн нэвтрүүлгээр хэдэн минут гараад өнгөрснөөс илүү бодит байдлыг ойлгоход танд нэмэртэй байх. Мөн түүнчлэн сонгогчдын сэтгэгдэл бичих, үнэлгээ өгөх боломжийг бүрдүүлбэл улс төрийн хүчнүүдэд ч гэсэн ард түмний санал ямар байгааг мэдэж болох тандалт судалгаа болж өгч чадах юм.
Мөн түүнчлэн ажиллаж байх хугацаандаа хийж буй ажил, мөрийн хөтөлбөрийн гүйцэтгэлийг харуулж байх диаграмм бий болбол 4 жил өнгөрөхөд хэн юу хийснийг нь бэлхнээ харж, дүгнэж болох юм.
Улс төрийн нам хүчнүүдийн амлалт, мөрийн хөтөлбөрт итгэх нь ховор болсон цаг үед физик, биет байдлаар харуулах нь илүү итгэл үнэмшил төрүүлэх хувилбар байж болох юм.
Энэ мэтчилэн уг технологийг ашиглах боломж хэмжээлшгүй их байгаа билээ. Шинэ үе, хөгжил дэвшлээ дагаад бид дижитал ертөнцөд илүү их цагийг өнгөрөөж, мэдээлэл авах хэрэгслүүд ч өөрчлөгдсөн. Үүнийгээ дагаад цахим орчин, интернет зэрэг нь бидний амьдралд илүү нөлөөтэй болсон. Гэтэл манай улс төрийн хүчнүүд одоо ч гэсэн гудамж талбайд дүүрэн зурагт самбар өлгөж, хадаж, зам талбай хааж, хаалганаас хаалга дамжин хэдэн тэрбум төгрөгийн өртөг бүхий, дараа нь эргээд хаягдах сонин сэтгүүл, зурагт хуудас, ухуулгын материал тараасаар. Хүн бүхэн ухаалаг утас ашиглаж, интернетэд холбогддог болсон энэ үед ердийн нэгэн утасны аппликэйшн гаргах нь үүнээс хавьгүй үр дүнтэй боловч хямд төсөр, хөрөнгө мөнгөнд хэмнэлттэй цаашлаад бүтээн байгуулалт сүйдэлж, олон хүний цаг үрэх шаардлагагүй болно.
Бид технологийн дэвшлийг хэзээнээс хэрэглэж эхлэх вэ?
