БНХАУ-ын Ухань хотоос гаралтай коронавируст халдвар өдгөө дэлхийн 216 улсад “зөөвөрлөгдөөд” байна. Олон сая хүний амийг авч одсоноороо улс орнуудыг хилээ хааж, хөл хорио тогтооход хүргэсэн уг вирус сарьсан багваахайнаас хүнд халдварласан байх өндөр магадлалтай гэж дэлхий нийт үзэж буй. Вирусийн голомт далайн бүтээгдэхүүний захаас үүдэлтэй ба хүмүүс сарьсан багваахай идсэн тухай мэдээлэл дэлхий нийтэд дуулиан тарьсан нь саяхан.
Хэдхэн сарын өмнө гудамжиндаа ганц машин байхгүй шахам нам гүм байсан Ухань хотынхон энэ зуны хамгийн том задгай шоугаа хийжээ. Тодруулбал, цэцэрлэгт хүрээлэндээ хийсэн электрон хөгжмийн наадамд олон мянган хүн маскгүйгээр, тэр байтугай хүн хоорондын зайгаа үл баримтлан оролцсон байна.
Мөн зургадугаар сарын сүүлээр нээгдсэн Ухань хотын Маяа усан паркт өнгөрсөн амралтын өдрөөр 15 мянган хүн цугларсан гэж “Hubei Daily” сонин мэдээллээ. Энэ үеэр тэд дэлхий дахиныг айлгаж, цаг, минут тутмаар нас барагсдын тоо нэмэгдэж байгаа вирусыг мартсан мэт юунаас ч айхгүйгээр хөгжмийн наадмаа баяр хөөртэйгээр тэмдэглэжээ. 60 сая хүн амтай Хубэй мужийн 11 сая хүн амтай Ухань хот 76 хоног хөл хорио тогтоосны дараа дөрөвдүгээр сарын эхээр хэвийн амьдралдаа шилжсэн. Хамгийн сүүлд тавдугаар сарын дундуур орон сууцанд зургаан шинэ тохиолдол бүртгэгдсэн.
Гэвч орон нутгийн удирдлагууд ес хоногийн дотор 6.5 сая хүнд шинжилгээ хийж маш түргэн арга хэмжээ авч, тархалтыг зогсоосон хэмээн мэдэгдсэн билээ. Тиймээс олон сар хөл хорионд байсан тус хотын залуус коронавирусыг дарж чадсан баяраа ийн тэмдэглэлээ. Арванхоёрдугаар сард Ухань хотод анхны тохиолдол бүртгэгдэж, нэгдүгээр сарын 23-нд хөл хорио тогтоосон.
Нийт 11 сая хүн амтай тус хотод тавдугаар сараас хойш дотоодод нь нэг ч халдварын тохиолдол бүртгэгдээгүй ба орон нутгийн эрх баригчид цар тахлыг намжааж чадсан гэж үзээд, 400 орчим аялал жуулчлалын дурсгалт газар, жуулчдын ихээр зорин очдог газруудын үйл ажиллагааг сэргээсэн байна.
Эдгээр газрууд нь хөнгөлөлттэй үнээр үйлчилж байгаа ба “Wuhan Maya Beach” усан паркийн хувьд эмэгтэй үйлчлүүлэгчдийн тасалбарыг 50 хувь хөнгөлөөд байгаа аж.
Бүх нислэг, галт тэрэг, автобусаа хүртэл зогсоож, олон нийтийн газруудаа бүгдийг нь хаасан. Түүнчлэн иргэдийг хүнсний дэлгүүр орохыг хүртэл хориглож байсан. БНХАУ-ын 84 мянган тохиолдлын 60 орчим хувь нь Уханьд бүртгэгдсэн гэж Хубэй мужийн Эрүүл мэндийн хороо мэдэгдээд байгаа юм.
Эх сурвалж: CNN
