Хятад улсын дахин ашиглах зориулалтын сансрын хөлгийн туршилт амжилттай явагдаж өндөрлөөд байгааг Синхуа дамжуулсан байна. Гэхдээ энэ хөлөгтэй холбоотой зарим мэдээллийг Бээжин нууцалж байгааг барууны хэд хэдэн хэвлэл онцолжээ.

Хөлгийг “Лон Марч 2F” пуужинд суурилуулж, 9-р сарын 4-ны өдөр Жючуанийн Хиймэл Дагуул Хөөргөх төвөөс хөөргөжээ. Энэхүү хөлөг хоёр өдөр задгай сансарт аялал хийсний дараагаар эх дэлхийд амжилттай газардаад байгаа юм. Энэ нь дахин ашиглаж болох сансрын хөлөг бүтээх Хятадын судалгааны ажилд үсрэнгүй хөгжил, ахицыг авчирсан үйл явдал болж байгааг Синхуа цохон тэмдэглэжээ. Гэхдээ энэхүү сансрын хөлгийн овор хэмжээ, хэлбэр дүрсээс эхлээд олон мэдээлэл тодорхой бус байгаа юм. Ахин хэрэглэх боломжтой сансрын хөлгийг хиймэл дагуул хөөргөх, засварлах, дэлхийн талаарх судалгааг явуулах, сансрын нисгэгч болон ачааг зөөвөрлөх зэргээр ашиглах боломжтой байдаг юм. 

Тус пуужинг бүтээсэн “Link Space” компанийн танилцуулгаас харахад, хятадуудын хийж байгаа пуужин зөөгч олон талаараа Америкийн Falcon 9 зөөгчтэй төстэй ба эргэн буухдаа өөрийн хөдөлгүүрийг ашиглах гэнэ. Тэд америкчуудын бүтээмжийг ашиглаж буйгаа нуугаагүй бөгөөд SpaceX компанийг өөрсдийн багшаа гэж үзэж байна хэмээн мэдэгджээ.

“New Line 1” нь зөөгч нь хоёр шаттай шингэн түлш ашиглах пуужин зөөгч бөгөөд өндөр нь 20 метр, 1.8 метрийн голчтой байх аж. Энэ нь Америкийн SpaceX пуужин зөөгчөөс мэдэгдэхүйц бага. Тиймээс ч хятад инженерүүд пуужин тойрог замд ямар жингийн ашигтай ачаа гаргаж чадахыг хэлээгүй байна. Харин тэд хоёрдугаар шатны хөдөлгүүрийг эргэн буулгаж ашиглах тал дээр ажиллаж байгаа аж. SpaceX компанийн инженерүүд ч энэ чиглэлээр ажиллаад эхэлсэн юм байна.

Төсөлд дөнгөж 45 сая ам.доллар зарцуулахаар төлөвлөсөн ба анхны туршилтыг 2020 онд хийгдэж магадгүй аж.  Хятадын зохион бүтээгчид орчин үеийн сансрын зах зээлд хамгийн хямдаар ердөө л 2.25  сая долларын зардлаар пуужингийн нэг удаагийн хөөргөлт хийж байх юм.

Ташрамд дурдахад, олон удаа ашиглаж болох сансрын хөлгийг бүтээх хөтөлбөрийг амжилттай хэрэгжүүлсэн хоёрхон улс байдаг нь АНУ болон хуучин ЗХУ юм. Хятад улс ийнхүү гурав дахь орон болохоор шаргуу ажиллаж байгаа бол Европын Сансрын Агентлаг мөн л дахин ашиглах зориулалтын тойрог замын хөлөг бүтээх төслийг эхлүүлээд  байна. 

Эх сурвалж: space.com