Дэлхийн худалдааны байгууллага цар тахлын улмаас 2020 онд дэлхийн нийт худалдаа 9,2 хувиар буурах урьдчилсан таамаг гаргажээ. Урьдчилсан таамгаар энэ онд Европын худалдаа 11,7 хувиар, Ази тивийнх 4,5 хувиар, Хойд Америк 14,7 хувиар тус тус буурах төлөвтэй байна.

Дэлхийн худалдааны байгууллага дэлхийн улс орнуудын эдийн засаг, бизнесийн салбараа сэргээж байгаа үйл явцад үндэслэн энэ таамгийг гаргасан юм байна. Хэрвээ "COVID-19" цар тахлын дэгдэлт улам давлагаалаад байвал олон улсын худалдаа, эдийн засгийн байдалд сөргөөр нөлөөлж, худалдааны эргэлт улам буурна гэдгийг анхааруулжээ.

Нөгөө талаар цар тахлын дараах дэлхийн эдийн засагт тулгарч байгаа нэг том эрсдэл нь татварын аргаар зах зээлээ хамгаалах явдал болно гэдгийг Дэлхийн худалдааны байгууллагын дэд захирал онцоллоо. Өөрөөр хэлбэл импортын татварыг нэмэгдүүлэх замаар дотоод зах зээлээ дэмжиж байгаа улс орнуудын эсрэг олон улсын хамтын ажиллагааг идэвхжүүлэх нь чухал гэж үзэж байна.

Харин Олон Улсын Валютын Сангийн тэргүүн "2020 оны өсөлтийн төлөв бага зэрэг дээрдсэн ч эдийн засгийн сэргэтэл өмнө тооцсоноос хамгийн багадаа нэг жилээр илүү хугацаа шаардана" гэж байсан юм. Дээрх хоёр байгууллагын тооцоогоор дэлхийн эдийн засгийн гарц дунд хугацаанд тахлын өмнөх түвшиндээ хүрэхээргүй байна. Үүний зэрэгцээ цар тахлын хоёр дахь давлагаа газар авч, халдварыг амжилттай хязгаарлаад байсан орнуудад дахин дэгдэлт эрчимжвэл нөхцөл байдал улам дордоно. Үүнээс гадна цар тахлын дараа худалдааны протекционист бодлогыг дэмжих хандлага нэмэгдэж байгаа нь хамгийн том эрсдэл гэдгийг байгууллагууд сануулжээ.

Цаашдын дэлхийн эдийн засгийн ирээдүй Төв банкнууд бус Засгийн газруудын гарт байгаа гэхэд хилсдэхгүй. Дэлхийн эдийн засагт нөлөө бүхий мөнгөний бодлогын шийдвэрийн 90 хувийг гаргадаг хамгийн хүчтэй 23 улсын Төв банк баримтлах бодлогоо нэгэнт зарласан юм. Эдгээр банкнуудын дөрвөөс бусад нь он дуустал бодлогын хүүгээ өөрчлөхөөргүй байгаа аж.

Өөрөөр хэлбэл мөнгөний бодлого тодорхой нөхцөлд төсвийн бодлогоор хэрхэн эдийн засгаа аврах шийдвэр Засгийн газруудын гарт байна. Хэдий тийм боловч дэлхийд тэргүүлэх эдийн засагтай АНУ-д ч хууль тогтоогчид нь нэмэлт төсвөө батлалгүй улстөрийн маргааны улмаас цаг алдаж байгаа нь Төв банкны удирдлагын шүүмжлэлд өртсөн юм.

Холбооны Нөөцийн банкны тэргүүн Жером Пауэлл "Төсвийн нэмэлт дэмжлэггүйгээр цаг өнгөрөх тусам улам олон бизнес АНУ-д дампуурч, өрхүүд орлогоо алдана" гэж мэдэгджээ. Гэвч "Ерөнхийлөгчийн сонгууль дуустал нэмэлт төсөв батлахгүй" гэж Дональд Трамп мэдэгдээд байна.

Эх сурвалж: Forbes