Хань минь хөдөө ажлаасаа алжааж онгосон, царай муутай , үг цөөнтэй ирэв. Уг нь инээд алдаад гэрэлтээд л орж ирдэг! Ноднингийн 11 дүгээр сараас өнөөг хүртэл гэртээ богино хугацаагаар цөөхөн ирсэн. Төмөр замын их засварын ажлыг удирдаж, Зүүнбаянгийн шинэ төмөр замын бүтээн байгуулалтын ажилд хэсэгчлэн дайчлагдах зэргээр таван чөлөөгүй ч, шижигнэсэн залуустайгаа эрүүл салхинд шударга үнэнээр ажиллаж явах нь бохир улстөр, хулгайн мөнгөөр хахсан муусайн даргын оронцгийн хийдгээс илүү чухал,ариун ажил юм чинь! Москвад олон жилийн өмнө Замчны мэргэжлээрээ дээд сургуулийг нь амжилттай төгсч, уржнанхан ОХУ-д замчин мэргэжлийнхээ доктор болсон хүн л дээ, манай хүн.

Одоогийн даргыг ирэхтэй зэрэг,Замын орлогч даргын том албан тушаалаасаа сайн дураараа буух өргөдлөө өгч түүнтэй хамт ажиллахаас татгалзсан нь ч учиртай . Аргамаг хүлгийн хатираа, ачааны илжигнийхтэй явдал нийцэхгүйтэй л адил. Ингээд говийн наранд улайсч, салхи шуурга сөрж эд маань 68 км зам энэ зуны турш зассан. Мөнгө, эрх мэдлийн өмнө гөлөг болцорсон зарим даргынхаа өмнөөс , ажил шалгах нэрээр ирж поопордог дээдэст хийсэн бүтээсэн ажлаараа нэр нүүр тахалж өгдөг ч ямар нэг муу юм болбол тэр дарганцарууд бус, эгэл ажилчид эд маань л ажил амьдралаараа торгуулдаг жам тогтоод удаж байгаа,УБТЗ-Д! Машин техник ямагт дутна, бүрэн бус .

Засах нэрээр үе үеийн дарга нар нь бизнес хийж, хуучирсан муу тэрэг техникээ хэн нэг дарга ирэх сургаар тийш нь шал худлаа, ачиж явуулж сүржигнэхийг яана?! Их ажил хийж буй дүр үзүүлэн дарганцарууд тайз засч байгаа нь энэ! Цаадуул нь ч хууртах нь инээдмийн шог. Ер нь даргад далдганаж , бааж шээхэд нь ч дагаж гүйгээд байгаад нь нугасгүй итгэдэг, нам хөөж, төр түмний мөнгө саан халаасаа харилцан чихэлцдэг пялдагуудын л мандан бадардаг Монгол улс болж дээ! Ажилчид гэртээ харихгүй улирлаар сунаж, илүү цагийн мөнгөө ч гологдол нэрт шалтгаар хуу хасуулдгийг, хүн ер ямар сэтгэлзүйтэй, ямар нөхцөлд ажиллах ёстойг тас мартаж зөвхөн дээрээс буудаг ямар ч үндэслэлгүй гэнэтийн том төлөвлөгөөнд массаараа хамруулан шахамдаж дуусч байна.

Хүнээ бодсон бодлого устсаныг нөхрийнхөө , ажилчдаа хаацайлж өмөөрөн , эрх ашгийг нь хамгаалан цаадуултайгаа утсаар хэрэлдэж учирлахаас олонтаа мэдрээд, өрөвддөг юм. Бодит хөрсөнд буухгүй юм тулгадаг , ажил мэдэхгүй пээдэлзсэн дарга нар нь , за тэр дунд нь мэргэжлийн бус, нам, улстөрийн шахааны , цагаахан гартай ,хаа хөндлөн мангар бацаанууд ч бий, Ерөнхийлөгч, Ерөнхий сайд нарыг л дагаж гүйж ирээд нэг их мундаг ажиллуулаад байгаа дүрд гарамгай тоглоцгооно. Нидэр дээрээ олигтой техник хэрэгсэл , өнөөх алдарт хулгайн бизнес, огт засагдаагүй ч зассан гэх баримтын ганцхан хуудас хятад тамгатай бичиг дагалддаг 1000 вагоны адилаар, юу ч үгүй тонуулж дууссан газар шүү!!! Өчнөөн байгууллага дамнан түрээслэж, хувийн хэвшлийнхнээс гуйж түүж байж машин техникээр хангагддаг нь аймшигтай.

УБТЗ -ын олон жилийн улстөржиж намжсан удирдлагууд, ялангуяа одоогийнх нь Жигжиднямаа гээчийн үед нүүрлэсэн хулгай, шахааны бизнесээрээ туйлдуулчихсан Монголын төмөр замыг дээд төвшний мэргэжил мэдлэг, цэвэр гар, залуу үед зөв нөөлөгт удирдлагаар хангахад үнэндээ бол, хэдхээн л хүн чармайн ажилладгийг нуух юун! Залуусын маань насны цог жавхаагаар бүтэж, улс орны эдийн засгийг тамиржуулах чухал ажил ч яг хар ажлаа гардан хийж буй энэ хэддээ ээлгүй , хэл амтай, чухам хүнд хэцүү ажил болгосон нь чадваргүй, сэтгэлгүй удирдлагын л балаг! Хувийн салбарт төмөр зам барьж буй нь огт өөр, цалин хангамж , амралт нөхцлөөр эд нарыг маань хол оо хаячихсан байхад социализмын захиргаадалт, капитализмын шулан мөлжлөг хавсруулан зүтгүүлсээр л байгаа нь зөвхөн УБТЗ.

Жинхэнэ төмөр замчид үүнийг ярьж, дотроо бухимдаад л байгаа даг! Үйлдвэрчний Холбоо нь ч энэ болон бусад бусармаг үйлдлийн эсрэг үе үе хэвлэлийн хурал хийж тэмцээд дийлэхгүй байгаа. Эрүүл биш дарамт шахалт их ирдгийн нэг жишээ. Хэд хоногийн өмнө Зүүнбаянд болсон говийн угалз шуурганаар нэг ажилчин залуу,амьдардаг сууц руугаа гүйж зуухаа галлах гэж байгаад угаартаж нас барсан хөөрхийлөлт хэрэг гарсан. Ерөнхийлөгчийн тавьж буй зам болоод ч тэр үү, сэмхэн өнгөрсөн ч хаа хамаагүй хол,250 км цаана ажиллаж буй ханьд минь хариуцлага тохох асуудал яригдсан бололтой .

Хуцна биз! Үнэхээр шударга сайн удирдлагтай, хариуцлагын тогтолцоотой байгууллагад бол дүрэм журмын дагуу хүлээх хүлээлгэх хариуцлага гэж байдаг л даа. Харин үүнээр далимдуулж явуургүй улстөрхөн хийх, өөрт саад учруулах вий гэж айхдаа мэддэг чаддаг хүнийг ажлаас нь салгах , нэр хүндийг нь сэвтээх гэж байгаа нь ой гутам юм ! Төмөр замд гай болсон гол ноцтой асуудлаа тэгвэл эхлээд ярьж ил болгочих ! Төмөр замын дарга Жигжиднямаа гэгчийн санхүүгийн гэмт хэргийн талаар сүүлийн 4 шахам жил сэтгүүлч нар үйлээ үзэж үсээ барж байгаа даа!

Миний бие ч дуу хоолой өргөсөн ч , салбарын бус зүйлд хүчээ тарамдахгүй, үнэн нь тодорч л таараа гээд хаяад явдгийг яалтай? ЗУУНЫ ЛУЙВАР гэж алдаршсан ГОК-ийнхоос хэд дахин хол давсан тоотой хулгай , луйврын баримтуудаа , тэрнийг идэлцэж уулцаж, хуулийнхны хамгаалалт дор авчихаад хөдөлгөхгүй байгаа тов тодорхой улстайгаа цуг илэрч гарч л таараа! Угаасаа ч дээр дооргүй бүгд л мэдэж , жигшин зэвүүцдэг !АТГ, ЦЕГ, ТАГНУУЛЫН ЕГ зэрэг байгууллагаас удаа дараа гарсан дүгнэлт, шалгалтын баримтуудыг би ч нүдээр үзэж байсан !

Харин яагаад шийдэхгүй оодруулаад байгааг тэр байгууллагуудын ажилтнууд ч дотроосоо, гайхахын туйл боллоо. Гаарсан хулгайч төр засагтай, гараас нь угаадас долоох шахсан хүлцэнгүй тэнэг ард олны нэгээхэн хэсэг болчихоогүй яваа дээрээ ухаартугай, та нар! Шударга үнэн хэзээд ялна гэсээр хохирч яваад байлгүй, үгээ хэлж тууштай тэмцэж сураач та минь! Салбарын сайддаа ч салаавч өгдөг луйварчин даргатай УБТЗ цаашид хөгжих үү? Зүүгээр хатгаад байвал зөрүүлээд тэвнээр шаана гэх үг бүдүүлэггүй сайхан эх хэлэнд маань бий шүү! Аятайхан л байгаарай, хулгайчууд аа! Монголын буяныг улстөрчид зарж худалдаж , ард олны шударга хөдөлмөр урьд үзэгдээгүйгээр үнэгүйдсэн нь салбар болгоныг нэрвэсэн,Төмөр зам ч түүхэндээ байхгүйгээр доройтсоныг дотор нь ажилладаг хэн бүхэн зориглож хэлэхгүй л бол, хэн та нарын өмнөөс дуугарах билээ?!

Ц.Хулан