5G болон хиймэл оюуны технологи ирээдүйд хэрхэн нөлөөлөх вэ?
Хиймэл оюун ухаан ба 5G технологи нь дэлхий дахинд томоохон өөрчлөлт авч ирж байгаа гэдэгтэй хэн ч маргахгүй байх.
Дээрх хоёр технологи нь орчин үеийн бүхий л салбарт түгээмэл хэрэглэгдэх болсон бөгөөд тэдгээрийн олонх нь цаг үетэйгээ хөл нийлүүлэхийн тулд үйл ажиллагаагаа өөрчилж эхэлжээ. Тэр бүү хэл 5G ба хиймэл оюуны хослолгүйгээр зарим салбарууд оршин тогтнох аргагүй болоод байна.
Ялангуяа Ковид-19-ийн үед хүн бүр гэрээсээ ажиллах болсон учраас сүлжээний хүчин чадал болон бусад зүйлийг сайжруулах шаардлагатай болсон тул тус хоёр технологийн хэрэгцээг улам бүр нэмэгдүүлж байгаа юм.
Хамтдаа байвал хүчтэй
5G сүлжээ нэвтэрч мэдээлэл дамжуулах хурд нэмэгдсэнээр урьд нь ердөө онол төдий байсан бүтээлүүд биеллээ олж цоо шинэ зах зээлүүд үүсэх боломжтой болжээ.
Тэдгээрийн нэг бол "Autonomous driving" буюу өөрийгөө жолоодох тээврийн хэрэгслийн салбар юм. Мэдээж хэрэг өөрийгөө жолооддог хэрэгсэлд мэдээлэл дамжуулах хурд болоод хиймэл оюуны технологи нь амин чухал юм.
Тээврийн хэрэгслийн камер, лазер радар, хэт авианы мэдрэгч болон бусад тоног төхөөрөмжийн тусламжтайгаар автомат жолооны систем нь орчныг мэдрэх чадвартай болох бөгөөд үүнийг автоматаар жолоодох шийдвэрийг хиймэл оюун хийдэг. Автомашин нь өндөр хурдтай явж байгаа үед хөдөлгөөний аюулгүй байдалтай холбоотой шийдвэрүүдийг хийхийн тулд робот жолоодогчид 5G шиг хурдан мэдээлэл дамжуулах технологи шаардагдана.
Эндээс харвал хиймэл оюун болоод 5G-г хослуулсан нь хамаагүй үр дүнтэй болох нь тодорхой болно.
Мэдээллийн технологий салбарт дээрх 2-ын хөгжүүлэлтийг дангаар хийж байгаа цөөн тооны компани байгаа.
Тэдгээр нь Huawei, MediaTek, Qualcomm нар юм. 5G модемийн салбараа Apple-д зарахаас өмнө Intel компани энэ жагсаалтанд багтдаг байсан. Нэмж дурдахад Apple компани шинэ iPhone 12-ийг анхны 5G ба хиймэл оюуны хослуулсан ухаалаг утас болно гэж мэдэгдээд байгаа.
Хиймэл оюун болоод 5G-ийн одоогийн хэрэглээ
Өмнө нь хэлсэнчлэн 5G ба хиймэл оюуныг хослуулж болох салбар нь хязгааргүй юм. Гэхдээ энэ алхам нь зарим салбарт богино хугацаанд үр дүнгээ өгөх бол олонх нь дээрх 2 технологийг илүү боловсронгуй болох хүртэл хүлээх шаардлагатай байна. Хиймэл оюун ба 5G-ийн хамтын ажиллагааг харах боломжтой хамгийн анхны бөгөөд хамгийн чухал салбар бол ухаалаг гар утас юм.
Өнгөрсөн жил Qualcomm компани 2020 оны эцэс гэхэд 5G сүлжээтэй 200 орчим сая, 2021 оны эцсээр 450 сая гаруй ухаалаг гар утас үйлдвэрлэгдэнэ гэж таамаглаж байсан.
Гэхдээ зөвхөн Хятад улс дахь одоогийн захиалагчдын тоог харвал 5G ухаалаг гар утасны зах зээл бүр ч том болох боломжтой аж.
Эдгээр технологийг ашиглаж буй өөр нэг түгээмэл, шууд хэрэглэж болох хэрэгсэл бол хиймэл оюун бүхий автомат туслахууд юм. 5G ба хиймэл оюуныг ашиглан автомат туслах нь хүний ярьсан зүйлийг текст болгон буулгах, хэлсэн зүйлийг шууд цахим орчноос хайх зэрэг зүйлсийг хийж байгаа. Судлаачид 5G-ийн тусламжтай эдгээр туслахуудын мэдээлэл боловсруулах чадвар нь өмнөхөөсөө 10 дахин илүү болно гэж тооцоолж байна.
Төгсгөл
Товчоор хэлбэл, 5G ба хиймэл оюун нь ирээдүйд ямар ч салбарт өөрчлөлт авч ирэх чадалтай юм. 5G ба хиймэл оюун ухааны хослол нь дээрх өөрчлөлтийг илүү хурдасгахад тусална. Ухаалаг гар утас, тээврийн хэрэгсэл, робот техник гэх мэт салбарууд нь ердөө эхлэл юм. 5G ба хиймэл оюун нь зарим талаараа Covid-19-ийн ачаар хурдацтай хөгжиж байгаа бөгөөд бид илүү боловсронгуй хувилбаруудыг тун удахгүй харах нь дамжиггүй.
Эх сурвалж: Forbes
